uran pillugu oqallinneq
Savaatillit: Uranip inuussutissarsiupput ulorianartorsiortippaa?
Savaatillit inuusuttat Savaatillit Inuusuttut Peqatigiit uranimut naaggaarluinnarneq atorunnaarpat nunalerinermut ataannarsinnaanera qularaat
- Imaannerpa, aatsitassarsiorniat soqutigisaat naalakkersuisunit isiginiarneqarnerusut, inuiaqatigiittullu pingaartitagut soqutigineqannginnerusut?, Savaatillit Inuusuttut Peqatigiit sinnerlugit Piitaq Lund taama aperivoq.
Atuaruk: IAp inuusuttai: Nunarput uranisiornissamut piareersarpa?
Taassuma erseqqissarpaa uranimut naaggaarluinnarnerup atorunnaarnissaa savaatillit inuusuttaasa akerlerigaat. Ilaatigut tunngavilersuutigaat isumaqaramik nunalerineq mingutsitsillunilu aatsitassarsiorneq imminnut ataqatigiinngitsut. Taakku aamma isumaqarput uranip peqqissutsimut avatangiisinullu ajoqusiinngitsumik passunneqarsinnaaneranik nassuiaanneqarsimannginnertik toqqissiunnaarutaasoq.
Kinguneri naluaat
- Ullumikkut savaatiliusugut ilisimatinneqarnikuunngilagut inuussutissarsiut pilersissimasarput uranimik piiaasoqalerpat navianartorsiortinneqassannginnersoq, Piitaq Lund oqarpoq.
Taanna aamma oqarpoq innuttaasut peqataatinneqannginnerit kingunerisinnaasaanillu nassuiaasoqannginnera toqqissisimannginnermik kinguneqartut.
- Sinnerluta aaliangiisoqarnissaa pissusissamisuunngilaq. Pissusissamisuunngilaq nul-tolerence atorunnaarsissallugu inuit inuussutissarsiuteqartullu peqataatinnagit. Isummersuutitta tusaaneqarnissaat kissaatigaarput. Siulitta inuussutissarsiutit pilersissimasaat uagut savaatillit inuusuttut nangitsisussaasugut kinguaatalu nangitassaat inuaqatigiillu kalaallit nammineq pilersulivinnissattunnut tunngavissarput siunissarput nalornissutigaarput. Eqqissilluta tuaviornatalu suleqatigiinniarta, Piitaq Lund oqarpoq.
Uran pillugu oqallinnermi allaaserisat uani atuarsinnaavatit.