Savalimmiormiut immikkoorput
Danmarkip Savalimmiullu naalagaaffeqatigiinnerat politikkikkut pisuuvoq. Savalimmiut ukiut untritilikkaat ingerlaneranni danskit naalagaaffiannut ilaasimagaluartoq danskit misigisimapput, savalimmiormiunik ataatsimooruteqaratik.
- Statsministerit Folketingimi ukiut kingulliit arlalissuit ingerlaneranni Savalimmiut Danmarkillu akornanni oqaluttuarisaanikkut kulturikkullu qilerutigineqartutut oqalugiarnerminni oqaatigisartagaat kusanartut danskit inuinnaasut ilisarisinnaanngilaat. Nunat taakku akornanni naalagaaffeqatigiinneq politikkimi inissisimavoq, Tina Adele Hansen naalagaaffeqatigiinneq pillugu Københavns Universitetimit kandidatitut soraarummeerlaaq taamak inerniliivoq.
Aperineqartut arlallit Savalimmiut sumiinnersorluunniit nalusimavaat. Danskillu Savalimmiut pillugit amerlanerpaatigut tusaamanerlunneqaatitut nutaarsiassaqaraangat tusagaqartarput, soorlu niisarnanik toqoraanerit imaluunniit angutit anguteqatiminnik ilaqartartut pillugit Savalimmiuni oqallinneq sakkortooq. Aamma Savalimmiut pineqartillugit danskit akornanni soqutaanngitsutut misigisimaneq pigineqaqqajaasoq Tina Adele Hansen Ritzauimut oqarpoq.
Taassuma peqqutaasunut ilaasoraa Savalimmiut tusagassiorfinni sammineqarpianngimmat aammalu danskit meeqqat atuartut Savalimmiut pillugit ilinniarneq ajornerat. Taamaakkaluartoq Savalimmiut Danmarkip avammut kiinnertarnerani pingaarutilittut inissisimavoq.
- Kalaallit Nunaat Savalimmiullu danskit naalagaaffiannut ilaanngitsuuppata Danmarki mikisunnguussagaluarpoq. Savalimmiut Kalaallit Nunaatalu naagagaaffimmut ilaanerat nunat tamat suleqatigiiffiinut soorlu NATO-mut tunngatillugu Danmarkimut pingaaruteqarpoq. Tamannalu tunngavigalugu isumaqarpunga danmarkip naalakkersuisa kikkulluunniit Savalimmiunut Kalaallit Nunaannulluunniit attaveqaatit kipitikkiartuaarnissaat soqutigisarinavianngikkaat Tina Adele Hansen oqarpoq.