Savalimmiormiut kalaallillu taarsiiffigineqassapput

Savalimmiormiut kalaallillu tapiissutinik annaasimasaannik suliassap nangeqqinneqarnissaanik siunnersuut Folketingip suliarisimavaa.

Savalimmiormiut kalaallillu Danmarkimi najugallit meeqqanut tapiissutinik pisinnaatitaanerminnik annaasaqarnerminnut atatillugu eqqunngitsumik pineqarsimapput. Naalakkersuisut kukkuneq iluarsiniarpaat, inatsisissatullu siunnersuuteqarput, tamatumuunakkut savalimmiormiut kalaallillu 2012-imi meeqqanut tapiissutit pinngitsoorsimasatik pisinnaalissallugit.

Kukkuneq naalakkersuisut aappassaa iluarseriarpaat.

2010-mi nunanut allamiunut inatsimmut atatillugu aningaasarsiaqarnermik tunngavik Folketingip akuersissutiga, taannalu meeqqanut inuusuttunullu tapiissutinut atuutissaaq. Tamatuma kinguneranik nuna allamiu ukiuni kingullerni qulini sivikinnerpaamik ukiuni marlunni Danmarkimi najugaqarsimassaaq, tapiissutinik tamakkiisumik pisinnaassaguni.

Inatsit 2012-imi atuutilerpoq. Savalimmiormiullu kalaallillu nunat allamiutut isigineqarput. Kingorna naalakkersuisut nassuerutigaat tamanna kukkunerusoq, inatsillu 2013-imi januaarip aallaqqaataanit atuutilersumik allanngortinneqarpoq.

Tassa imaappoq, savalimmiormiut kalaallillu 2013-imi qallunaatulli tapiissutinik tunineqarput. Tamannali sioqqullugu, 2012-imi, nuussimasut ukiut qulit iluanni sivikinnerpaamik ukiuni marlunni Danmarkimi najugaqarsimassapput, tapiissutinik tamakkiisumik pisinnaassagunik.

Siunnersuummi, Folketingip novembarip 25-anni siullermiigaani, allassimavoq taassuma atuutilerfia 2012-imi januaarip aallaqqaataanut kinguartinneqartoq. Taamaattumik savalimmiormiut kalaallillu, meeqqanut tapiissutinik annaasaqarsimasut, namminerminnut tunngasut suliariteqqissinnaalerpaat. Taamaasiluni kukkuneq iluarsineqarpoq.

Atlantikup avannaanit ilaasortat
siunnersuut nuannaarutigaat

Savalimmiunit folketingimut ilaasortap Sambandspartimeersup Edmund Joensenip, kalaallillu ilaasortaatitaata IA-meersup Sara Olsvigip (septembarip qiteqqunnerani partiimi siulittaasunngorami Folketingimit anisup), savalimmiormiut kalaallillua aningaasarsianut tunngavimmik kukkusumik peqataatinneqarnerisa iluarsineqarnissaa sulissutigisimavaat.

Aamma naammagisimanngilaat EU-mi innuttaasut, aamma naapertuutinngitsumik aningaasarsianut tunngavimmut peqataatinneqarsimasut, taarsiiffigineqarsimanerat, savalimmiormiulli kalaallillu pinnatik. Tamatumunnga pissutaatinneqarsimavoq Savalimmiut Kalaallillu Nunaata EU-mut ilaasortaannginnerat. Folketingimut ilaasortat taakkua marluk isumaqarput naalagaaffeqatigiinni innuttaasut assigiinngitsumik pineqarsinnaanngitsut.

– Nutaarsiassaq pitsaasuuvoq, tamassumalu takutippaa naalagaaffimmi innuttaasutut pisinnaatitaaffiit ataqqineqartut. Aningaasat kingumut atuuttumik tunniunneqassapput. Tamanna pissusissamisoorpoq, tassa naalakkersuisut marsip tallimaanni nassuerutigimmassuk Sambandspartip Christiansborgimi piumasaqaataa akuerineqartariaqartoq. Maanna inatsisissatut siunnersuut saqqummiunneqartoq, tamannalu naammagisimaarpara, Edmund Joensen quppernermini nittartakkamini allappoq.

Aamma savalimmiunit folketingimut ilaasortap aappaata, Sjuúdur Skaale-p, socialdemokratiskitut partiimit Javnadarflokkurin-imeersup, naalakkersuisut siunnersuutaat nuannaarutigaa.

– Qujassutigerusuppara siunnersuut saqqummiunneqarsimammat, Sjúdur Skaale siunnersuutip siullermeerneqarnerani folketingip oqaluttarfianit oqarpoq.

Akileraartarnermut ministerip eqqoriarpaa savalimmiormiut kalaallillu meerartaasa 500-t missaanniittut angajoqqaavinut meeqqanut tapiissutit kingumut atuutilersumik tunniunneqassasut. Suliassat tamakkua suliarineqaqqissinnaalerput.