Savalimmiormiut naalakkersuisuisa namminersulivinniarneq ingerlateqqippaat
Savalimmiunut tapiissutaasartut, maanna ukiumut 615 mio. koruuniusut, ukiuni tullerni 160 mio. koruuninik ikilisinneqassapput. Savalimmiuni tunngaviusumik inatsisissaq innuttaasunut aamma taasisitsissutigineqassaaq.
Savalimmiormiut 2010-mi Savalimmiut namminersortut tunngaviusumik inatsisissaat taasissutigissavaat. Tamatuma saniatigut Danmarkimit tapiissutit ukiuni tullerni 117 mio. koruuninik ikilisinneqassapput, Ritzau allappoq.
Savalimmiormiut, namminneq akilersugassarilikkaminnik, suliassaqarfinnik amerlanerusunik tigummiaqaleraluartut danskit akileraarutaat 160 mio. koruuninik ikinnerusut Savalimmiunut tunniunneqartassapput.
19. januari qinersisoqareermat Savalimmiuni naalakkersuisut nutaat qinersivimmi tulliuttumi namminersulivinnissaq pillugu naalakkersuinikkut suliniutiginiagaat ilaatigut tamakkuuput.
Naalakkersuisooqatigiinngortut Socialdemokratiet, Republikanerne aamma Centerpartiet naalakkersuisuunerminni tunngavissartik arfininngormat unnukkaa saqqummiuppaat.
- Namminersulivinnissamut suliniutit aallateqqippagut. Soorunami iluarisimaaqaarput, Høgni Hoydal Republikanerini siuttuusoq Savalimmiullu namminersortunngornissaannik pingaartitaqartuusoq Ritzau-imut oqarpoq.
Republikanerit ukiuni sisamani illuatungiliuttuusimapput. Partiit tamarmik oqaasertaligaannik Savalimmiut tunngaviusumik inatsisissaannik suliaq annertooq Republikanerit suliniutigisaannik ingerlateqqinneqartussanngorpoq. Tunngaviusumik inatsit Savalimmiormiut 2010-mi taasissutigisassaat atortinneqaleraluaruniluunnit Savalimmiormiut namminersortunngortussaanngillat.
- Nunarput qanoq aqussaneripput Savalimmiormiut tunngaviusumik inasisaata aalajangissavaa. Avataaniit – soorlu qallunaat tungaanniit- tunngaviusumik inatsit qanoq isumaqarfigissaneraat uagut susassarinngilarput, Høgni Hoydal Ritzau-imut oqarpoq.
Namminersulivinnissamik suliamut atatillugu nunat allat pillugit isummersuisoqatigiit nutaat ivertinneqassaput taakkualu Savalimmiut nunanut allanut attveqarnerat isumagissavaat. Høgni Hoydal-ip oqaasii tunngavigalugit Savalimmiut EFTA-mut ilaasortanngortinnissaa EØS-ilu pillugu aaqqissuussamut ilaatinneqalernissaa anguniagaavoq. Nunat allat pillugit naalakkersuineq suli danskit tigumissavaat, Savalimmiulli nunat allat pillugit naalakkersuinikkut annertusisamik pisinnaatitaassapput.