Savalimmiuni 94-it qinigassanngortipput
Marlunngorpat folketingimut qinersinermi Savalimmiuni qinersisartut 94-imik qinigassaqarput, Kalaallit Nunaanni 16-iinnaat qinigassanngortittut.
Tamanna pisortatigoortumik qinigassanngortittut allattorsimaffianni, sisamanngormat Nunap iluani pissutsinut Peqqinnissamullu ministereqarfiup tamanut saqqummiussaani, takuneqarsinnaavoq.
Savalimmiuni Kalaallillu Nunaanni folketingimut ilaasortanik marlunnik qinersisoqassaaq. Savalimmiuni qinigassanngortittut 94-it partiinut arfinilinnut agguataarsimapput. 2005-imi folketingimut qinersinermi qinigaasut marluk tassaapput Høgni Hoydal Republikanerineersoq, aamma Annfin Kallsberg Folkeflokkenimeersoq. Taakkunannga marlunnit Høgni Hoydal kisimi qinigassanngorteqqippoq.
2005-imi Kalaallit Nunaanni qinigaapput Lars-Emil Johansen Siumumeersoq aamma Kuupik Kleist Inuit Ataqatigiinneersoq. Nunatsinnissaaq ikinnerpaamik ataatsimik nutaamik Folketingimut isertoqassaaq, tassa Kuupik Kleist qinigassanngorteqqinngimmat. Folketingimut qinigassanngortittut 16-it partiinut sisamanut agguataarsimapput. Taamatut allappoq Ritzau.