Savalimmiuni niisarnarniaruttulerput
Savalimmiormiut niisarnarniarneq assortuussutaaqisoq aallartippaat. Sapaatit akunneri marluk kingulliit niisarnat 150-it pisarineqarput.
Savalimmiormiut niisarnarniartarneq assortuussutaaqisoq aallartippaat. Ulluni kingullerni qulini niisarnat ataatsimoortut pingasuiit katillugit 150-inik amerlassuseqartut qeqertat eqqaanni naammattoorneqarput, tamatumalu kingorna ungullugit sissamukartinneqartarput tassanilu toqorarneqarlutik.
Niisarnanik aasaanerani toqoraasarnermut pissutaasoq tassaavoq, niisarnat nerisartagaat – amikut – ukiup taamaalinerani nunamut qanittunnguamiittarnerat.
Savalimmiormiut niisarnanik toqoraasarnerat pillugu nunani allani uumasunik illersuiniaqatigiit – tassunga ilanngullugu Poul Watsonip illersuiniaqatigiiffiutaa "Sea Sheperd" – sakkortuumik qisuariaateqartarnerat pissutaalluni Savalimmiormiut naalliutsitsinnginnerullutik niisarnanik toqoraasalersimapput.
Ilaatigut angutit niisarnanut qangaaniilli kapuummik atorneqartartumik kapiseqqusaajunnaarsimapput – niisarnanik malersornermi aqutsisoq eqqaassanngikkaanni. Maannakkut niisarnat qungasiisigut savimmik kapillugit toqunneqarasuartalerput.
Niisarnat ima amerlatigaat, Savalimmiuini niisarnanik toqoraasarneq niisarnat amerlassusaannut ernumanartorsiutaanani. Ullumikkut niisarnat 800.000-it missaanniissagatinneqarput. Taakkunannga Savalimmiormiunit 0,1 procentit toqunneqartarput. Nunat tamalaat akornanni arferit pillugit ataatsimiititaliarsuaq – IWC – naapertorlugu pisarineqartartut 2 procentiuppata, taava niisarnat nungutaanissaat ernumanartorsiutaasinnaanngilaq.