Savalimmiuni oktobarip 31-ani qinersissapput

Savalimmiuni Folketingimut siusinnerusukkut qinersisoqartussanngorpoq. Folketingimi partiit amerlanerussuteqartut tamanna aalajangerpaat.

Danmarkimi nunamut namminermut ineqarnermullu ministerimit Christian Rabjerg Masenimit Ritzauimut uppernarsarneqarpoq.

- Savalimmiuni novembarip aallaqqaataaniunngitsoq, taamaattoq oktobarip 31-ani Folketingimut qinersisoqassasoq aalajangiunneqarpoq.

- Savalimmiumiormiut piumasaqaataat Folketingimi partiinit annerusumik minnerusumilluunniit akuerineqarnera nuannaarutigaara, oqarpoq.

Naalagaaffeqatigiiffimmi novembarip aallaqqaataani qinersinissami Savalimmiormiut statsministerimut qinnuiginninnikuupput oktobarip 31-ani qinerserusullutik.

Nuna tamakkerlugu eqqaaniaaneq

Qinnuteqaat Folketingip partiivinit ataatsimiissutigineqarpoq arfininngormat.

Novembarip aallaqqaataani folketingimut qinersisoqartussaanera isorineqarsimasoq Savalimmiuni lagmandip Bárdur Steig Nielsenip oqaatigaa. Allakkiami statsministerimut tamanna oqaatigaa.

Ullormi tassani Savalimmiuni immami ajunaarsimasut eqqaaniarneqartarput.

Novembarip aallaqqaataani Savalimmiuni eqqaaniaasoqartarnera statsministerimit Mette Frederiksenimit ilisimaneqarsimanngilaq. Tamanna DR-imut arfininngormat oqaatigaa.

- Qinersititsilernermi statsministerisut ima imminut aperisoqartuaannarpoq: "Ulloq sorleq qinersivigissallugu pitsaanerua?" Qinersisoqarnissaata suaarutigineqannginnerani ilisimasimanngilara Savalimmiuni ullormi tassani eqqaaniaasoqartartoq.

Folketingimut qinersinermi ataatsimi aamma Savalimmiuni ullormi allami qinersisinnaanermut akuerineqarnikuuvoq.

Partiit gruppiisa arfininngornermi ataatsimiigiaqquneqarsimanerat nunamut namminermut ineqarnermullu ministerip Christian Rabjerg Madsenip (S) tusagassiutinut nalunaarutigaa.

Savalimmiuni siusinnerusukkut qinersisoqarsinnaanera Folketingimi partiinit isumaqatigineqarnersoq ataatsimiissutigineqartoq, ministerip oqaatigaa.

Kalaallit Nunaanni qinersisoqarneranut sunniuteqassanngilaq

Savalimmiuni siusinnerusukkut qinersisoqartussaanera Danmarkimut Kalaallit Nunaannullu qinersinernut sunniuteqassanngitsoq ministerip naqissuserpaa.

Partii Moderaterne kisiartaalluni akuersilluni taaseqataanngilaq. Savalimmiuni siusinnerusukkut qinersisoqarnera novembarip aallaqqaataani qinersisoqarneranut sunniuteqarsinnaasoq partiimi siulittaasup Lars Løkke Rasmussenip akuersilluni taaseqataannginnerminut Twitterikkut tunngavilersorpaa.

- Danmarkimi qinersinissamit ullormik ataatsimik siusinnerusumik Savalimmiuni qinersisoqarsinnaanera pillugu lagmand statsministerimut qinnuteqarpoq, allappoq.

- Taamatut piumasaqarnera Savalimmiuni innuttaasunit ilumut tapersersorneqarnersoq erseqqissumik takuneqarsinnaanngilaq. Savalimmiuni innuttaasunit piumasaqaat tapersersorneqassappat ajunngilaq. Taamaattoq qinersinerup inernerata saqqummiunneqarnissaa pissusissamisuunngilaq, qinersinermummi sunniisinnaavoq.

Savalimmiuni Folketingimut qinersineq oktobarip 31-ani unnukkut saqqummiunneqassasoq Christian Rabjerg Madsenip naatsorsuutigaa. Tassa Danmarkimi qinersinissamut ulloq ataaseq sioqqullugu.

- Qinersereernerup kingorna qinersinermi inernerit saqqummiunneqartarnissaat Savalimmiuni qinersinermut inatsisaavoq. Taamaattumik naatsorsuutigaara qinersinerup inernera oktobarip 31-ani saqqummiunneqassasoq, oqarpoq.

Qinersinerup inernera novembarip aallaqqaataanut sunniisinnaanera ministerimit ernumagineqanngilaq.