Savalimmiut meerarsianik rekordiliipput
Savalimmiuni arnat meerartaartartut amerlareeraluartut nunanit allaniit qitornarsiartaartarnermikkut rekordiliipput.
Qitornarsiartaartarneq Savalimmiuni nuannarineqarluarpoq. Innuttaasut amerlassusaanut sanilliullugu atlantikup avannaani qeqertat taakku nunanit allamiunik qitornarsiartaartartut nunarsuarmi amerlanerpaapput. Peqatigitillugu savalimmiormiut arnartaat agguaqatigiisillugu 2,6-inik meerartaartarput taamalu Europami agguaqatigiisitsinermit Danmarkimiillu qaffasinnerungaatsiartumik inissisimallutik, Danmarkimi arnat agguaqatigiisillugu 1,7-inik meerartaartarput.
Qallunaat sullissusuat Danadopt - qitornarsiartaassanik ingerlatitseqqittarfiusoq - naapertorlugu savalimmiormiut ukiut tamaasa nunanit soorlu Boliviamit, bulgariamit, Kinamit Indiamiillu 20-inik qitornarsiartaartarput. Amerlasorinarsinnaanngikkaluartut innuttaasunut 48.000-iusunut naatsorsuusiukkaanni assersuutigalugu Danmarkimut Frankrigimullu sanilliullugu sisamariaammik amerlanerupput.
Ritzau naapertorlugu qitornarsiartaarpassuarnut nassuiaataasinnaavoq tamaani qangarsuaaniilli allat qitornaannik isumaginninnermik tigusisarneq ileqqummat. Siornatigut nalinginnaasuusimavoq, arnat meerarpassuallit, imaluunniit uillarsimasut meeqqatik ataaseq amerlanerusulluunniit meeqaqanngitsunut tunniuttarlugit.