Savalimmiut Ruslandimut aalisarnermut isumaqatigiissusiorput
Ruslandip Ukraine tiguarniarlugu saassussimagaluaraa, Savalimmiut Ruslandimut aalisarnermut nutaamik isumaqatigiissusiorput.
Rusland aamma Savalimmiut ukiut siuliin i isumaqatigiissutigineqartartunit allaanerusumik, aalisarnermut isumaqatigiissummik sapaatip akunnera kingulleq atsioqatigiissuteqarput.
Savalimmiut Ruslandilu aalisarnermut tunngasuni 1977-imili isumaqatigiissusiortarpoq, taamaasillutik imartani aalisakkat pisuussutit nunat illuatungeriillutik iluaqutigisinnaanngorlugit.
Tuluit tusarnaarneqarsimasut
Ukioq mannali isumaqatigiissut allaanerussuteqarpoq, Ukrainemi sorsunnermut attuumalluni, DR nittartakkamini ilisimatitsivoq.
- Isumaqatigiissummi nutaartaasoq tassaavoq savalimmiormiut tuluit nunaannut tusarnaarsimammat, taakkumi piumasaqarmata Savalimmiut kujataani russit aalisassanngitsut, tassa Savalimmiut Tuluit Nunaatalu akornanni imartami, Kringvarp-imi tusagassiortoq John Johannesen DR Nyhedernemut ilisimatitsivoq.
Russit Shetlandsøernep kitaani aalisarsinnaasarsimagaluarput. Tassa imartami Savalimmiut aamma Tuluit Nunaata akornanni. Tuluit tamanna iluarisimanngilaat, russit tuluit imartaanni aalisarsinnaanerannik itigartitsisimanertik pillugu. Savalimmiunut isumaqatigiissummut nutaami russit Shetlandsøernep kitaani aalisaqqusaajunnaarput.
Saarullinniarneq annikillineqarpoq
Uumassusilerituut innersuussutaat malillugu russit imartaanni Barentshavemi saarullinniarneq 20 peocentimik annikillineqarpoq. Pisassanik ikilisaanissaq naatsorsuutigineqareersimavoq.
Aalisarnermut isumaqatigiissut Savalimmiuni innuttaasunit saqitsaassutigineqarpoq. Pingaartumik Thorshavnimi innuttaasut Ruslandimut isumaqatigiissusiornissaq isumaqatiginngilaat, Ruslandip Ukrainemut 24. februar 2022-mi saassussisimanera pissutigitillugu.
Nunanut allanut ministeri Lars Løkke Rasmussen DR-ip nutaarsiassaqartitsivianut ilisimatitsivoq aalisarnermut tunngasuni Savalimmiut nammineq aalajangiisinnaassuseqartut.