Savilersorluni saassussisimasoq ukiuni sisamani pineqaatissinneqartoq
Angut savilersorluni saassussinermi toqutseriarsimasutut marlunngornermi pineqaatissinneqarpoq. Pineqaatissinneqartup eqqartuussut nunatta eqqartuussivianut ingerlaannartumik suliassanngorteqqippaa.
Angut 27-nik ukiulik toqutseriarsimasutut unnerluutigineqartoq pillugu Sermersuumi eqqartuussivik ataasinngornermi marlunngornermilu suliaqarpoq.
Pinerlunneq siorna juulip pingajuani unnukkut pivoq. Unnerluussut naapertorlugu angutip pinerlisani - angut alla - ikiaroornartuutaanik ujajaaffigeriaraluarpaa, ujajaaffigineqariaraluartorli akiuussimavoq.
Unnerluutigineqartup pisumi ujajaaffigeriakkani savimmik aqqanileriarlugu kapivaa - niaquatigut qungasiatigullu katillugit arfineq-pingasoriarluni, timaatigullu pingasoriarluni kapisimallugu.
Savilersornermi pinerlineqartoq puammigut kapineqarsimavoq, unnerluussisussaatitaasorlu Brian Viholt, Kalaallit Nunaanni Politiini inatsisilerituutut siunnersortiusoq, isumaqarpoq saassunneqartoq inuartarineqarsimasinnaagaluartoq:
Nunatta Eqqartuussivianut suliassanngortitseqqiisoq
- Suliaq sakkortulluinnarpoq, saassunneqartoq piaartumik ikiueqqaarnermik pitsaasumik ikiorneqarsimanngitsuuguni, toqusimassagaluarmat, Brian Viholt oqarpoq.
Taanna Sermitsiaq.AG-mut oqaluttuarpoq eqqartuussiviup angut 27-nik ukiulik toqutseriarsimasutut eqqartuukkaa, unnerluussisussaatitaasullu piumasaat malillugu ukiuni sisamani pinerluuteqarsimasunut inissiisarfimmiittussanngorlugu pineqaatississimagaa.
Unnerluutigineqartup suliaq nunatta eqqartuussivianut suliassanngorteqqippaa, toqutseriarsimasutut pineqaatissinneqarumanani, taamaattorli persuttaasimasutut pineqaatissinneqarnissaq kisiat angujumallugu.
Unnerluussisussaatitaasulli eqqartuussiviup aalajangiussaa, tassa toqutseriaasimasutut pineqaatissiineq naammagisimaarpaa. Brian Viholt ilisimatitsivoq unnerluussisussaatitaasup suliami eqqartuussiviup aalajangernera maleqqullugu, imaluunniit sakkortunerusumik pineqaatissiinissaq anguniarlugu nunatta eqqartuussivianut suliassanngortitsilluni aamma piumasaqarsimalluni.
Suliap nunatta eqqartuussiviani suliarineqarnissaata tungaanut unnerluunneqartoq tigummigallarneqassaaq.