Saviminilerinermik Ilinniarfik Sisimiunut nuunneqassaaq
Tupaallannaqisumik maanna pilersaarutigineqalerpoq Saviminilerinermik Ilinniarfik Nuummit Sisimiunut nuunneqassasoq
Imarsiornermik ilinniarfiit Nuummut katersorneqarnissaannik Naalakkersuisut aalajangernerat piffissami matumani nunami tamarmi pakatsissutaaleruttortoq maanna saqqummiunneqarpoq Saviminilerinermik Ilinniarfik qularnanngitsumik Nuummit Sisimiunut nuunneqassasoq.
Nutaarsiassamik taassuminnga saqqummiussipput Qeqqata Kommuniani borgmesteri Hermann Berthelsen, Siumut, aamma ilinniartitaanermut, ilisimatusarnermut nunanilu avannarlerni suleqatigiinnermut Naalakkersuisoq Palle Christiansen, Demokraatit.
Atuaruk "Sisimiut illoqarfittut ilinniagaqarfittut nukittorsarneqassaaq"
Ilinniarfiup nuunnissaa Naalakkersuisut ilinniagaqartitsinermut pilersaarutaata ilagaa.
- Uannut pingaaruteqarpoq erseqqissassallugu ilinniagaqartitsinermut pilersaarutip piviusunngortinnissaa Naalakkersuisut suli sulissutigimmassuk. Tamatumunnga ilaavoq teknikkikkut ilinniagaqarfiit katersornissaannut, tamatumani ilanngullugu Saviminilerinermik Ilinniarfiup Sisimiunut nuunnerani, illussaqartitsinissaq, fagitigut avatangiisinik suli pitsaanerusunik pilersitsisinnaasumik. Tamatumunnga atatillugu isumaqatigiissutigaarput suleqatigiissitaliussalluta, Saviminilerinermik Ilinniarfiup Sisimiunut nuunneqarnissaanik suliarinnittussamik, Palle Christiansen oqarpoq.