Savissivik: Piniartut isertitaarutivissimasut
- Utoqqalinersiallit ilanngui allallu pisortanit isertitaqartut aningaasaatimininnguaminnit perlernaveeqqusiillutik ikiuutilaartarnerisigut meerartallit nerisassamininnguanik pissarsisarput. Qimmigut qimuttut pisariaqarteqisagut aamma nerisassaqartitsinngilagut, Ole Kristensen Savissivimmeersoq oqaluttuarpoq.
Savissivimmi piniartut allatut iliorsinnaanatik imaq sikoqanngitsoq kaperlaap nalaani isiginnaaginnarsinnaavaat, tarrup ataani umiatsiamik piniariarsinnaanngillat, imarlu sikusimanngimmat qimusserlutik puisinik piniariarsinnaanngillat.
Novemberip aallartilaarneranili piniartut ilaquttatik pilersorsinnaajunnaaqqavaat, akiligassatik akilersinnaajunnaaqqavaat, aammalu piniartunut pingaaruteqarluinnartut qimmitik nerisassaqartinngilaat. Piniariarsinnaannginnamillu inunnut qimminulluunniimmi neqimik pissarsisinnaanngillat.
- Utoqqalinersiallit ataasiakkaannguit pisortanillu pisartagalimininnguit aningaasarsiamininnguaminnit ikiuullutik pingaartumik meerartalinnut kaannaveersaartitsiniaqataapput, piniartoq Ole Kristensen oqaluttuarpoq.
Ole Kristensen erseqqissaavoq pissutsit nalinginnaasut atuukkaangata ukioq naallugu ilaquttaminnik pilersuisinnaasaraluarlutik, maannali sikunngitsoortalernerata eqquinerluttalernikuuvoq, tamannali pinngikkallarmat ajornartorsiuteqartarsimanngikkaluarlutik pilersuinissaminnut aammalu qimmiminnut nerisassaqartitsinissaminnut.
Novemberi aallartilaartorli isertitaarupput
Savissivimmi aalisartut piniartullu peqatigiiffianni siulittaasoq, Ole Kristensen piniartoqatini sinnerlugit aqqutissaasinnaasut tamaasa atorlugit ajornartoornertik pillugu pisortanit ikiorneqarnissamik ujartuisimagaluarpoq, aamma KNAPK ikiortigalugu aqqutissarsiorsimagaluarpoq:
- KNAPK ikiuunniarsarigaluarpoq ajornartoornerput aallartimmalli. Sinnerluta Namminersorlutik Oqartussanut Naalakkersuisunullu saaffiginnittaraluarput annertuumik ajornartoornitsinni ikiorneqarsinnaanissarput pillugu, erseqqissaateqaraluarput ilaquttagut pilersorsinnaajunnaaqqagigut, akiligassagut akilersinnaajunnaaqqagigut, tassami novemberi aallartilaartorli arlaannaatigulluunniit isertitassaarunnikuugatta, Ole Kristensen Sermitsiaq.AG-mut oqaluttuarpoq.
Ole Kristensen oqaluttuarpoq ilungersoraluarnertik aalisarnermut piniarnermullu naalakkersuisoqarfimmit allaffissornikkut akineqaannarsimasoq innersuussisoqaannarsimasorlu Avannaata Kommunianut saaffiginnissinnaasut.
Taamak akineqarnerup kingorna aamma Avannaata Kommunianut saaffiginnissimagaluarput, tassanngaaniilli innersuunneqaannarsimapput suliffissarsiortutut naqitsikkiartorsinnaasut pisortanit ikiorneqarnissartik angusinnaassagunikku. Piniartut qulit tamarmik ilaquttaminnik pilersuisinnaajunnaaqqasut kommunimut ornigussimagaluarput, allamilli angusaqarsimanngillat taamaallaat naqitsissimapput suliffissarsiortutut.
KNAPK-p ikiuunniarnerata saniatigut kommunimullu saaffiginnikkaluarnerup saniatigut aamma aningaasaateqarfik Thulefonden saaffigisimagaluarpaat ikiorneqarnissaminnik qinnuteqarlutik, tassanngaaniilli aamma ikiorneqarnissaminnik angusaqaratik.
Meeqqat oqaaseqartartuat sakkortuumik ernumasoq
Pisoq ajunaarnersuartut isikkulik aamma meeqqat oqaaseqartartuannik qisuariartitsivoq. Aviâja Egede Lyngep paasitinneqarsimanera naapertorlugu Savissivimmiinnaanngitsoq, Qaanaamili nunaqarfittaanilu tamani ajornartoorneq pivoq:
- Piniartut arlallit ilaqutaalu Avanersuarmi, Qaanaami, Siorapalummi aamma Savissivimmi annikilliulersimapput qaammaterpaalussuarni immap sikua qerinngitsoorneratigut piniarnissamik periarfissaarummata. Meeqqat Oqaaseqartartuata Naalakkersuisut kajumissaarpai piniartut ilaqutariit silaannaap allanngorneratigut annikilliulersimasut isumageqqullugit.
Nunatta avannaarsuuani immap sikuata amigaataalersimanerata kingunerisimavaa inuussutissarsiutigalugu piniartut qaammaterpassuarni piniariarsinnaanngitsut. Immap sikua amigartillugu piniarnissamik periarfissaqanngilaq, tamanna pissutigalugu piniartut isertitamikkut inuussutissatuatik annaasivaat, tamannalu meeqqanut kingunerluppoq.
- Ajornartoorfimmik nalaattoorsivugut. Ilaqutariit annertuumik annikilliorput, ilaqutariillu killissartik qaangerujussuaqqavaat, tassami meeqqatilluunniit nerisassaqartinngilaat. Silaannaap ingasattajaartumik allanngoriartornerata inuiaqatigiinnut tamanut akornutaalerpoq, taamaalineranilu piniartut ilaqutariit immikkut ittumik eqqugaapput, tassami meerartai taamaalillutik ajornerpaamik eqqugaapput”, taamatut oqaaseqarpoq Meeqqat Oqaaseqartartuat Aviâja Egede Lynge.
Pisoq pillugu Naalakkersuisut aammalu Avannaata Kommunia oqaaseqartinniarlugit Sermitsiaq.AG-mit sulissutigaarput.