Seminarip kingorna inuit innarluuteqartut pillugit paasititsiniaasoqalersoq
Kattuffiit, peqatigiiffiit inuillu innarluuteqartut nuna tamakkerlugu inuit innarluuteqartut pillugit politikkeqartoqarnissaa kissaatigaat. Paasititsiniaaneq #taasisuttitusindtit atorlugu inuit innarluuteqartut amerlanerunerat erseqqissarneqarpoq.
Inuit innarluuteqartut pisinnaatitaaffii malunnaatilimmik pitsanngorsarneqarnissaasa pisariaqassusaat, paasititsiniaanermi nutaami ersarissarneqarpoq. Ilanngullugu maluginiaqquneqarpoq inuit innarluuteqartut nunatsinni ataasiakkaaginnaannginnerat.
Tilioq Ilulissani seminarimik isumasioqatigiinnermillu ingerlatsereerluni, inuit innarluuteqartut inuiaqatigiinni akuutinneqarnerunissaannik politikerit suliniaqqullugit, paasititsiniaanermik aallartitsivoq.
Tilioq tusagassiorfinnut taama nalunaaruteqarpoq.
Akisussaaffimmik tigusigitsi
- Neriuutigilluinnarpara paasititsiniaanerup takutissinaagaa inuppassuaqartoq arlaatigut innarluutilinnik. Soorunami aamma neriuppunga politikeritta inuppassuit sullitatik innarluuteqavittut eqqarsaatigissagaat, taamaattumillu inuit innarluutillit pisinnaatitaafiinik suliaqarneq nuannarineqarluarluni inuppalaartumillu oqaluuserisassaasoq, politikeriniillu soqutiginngitsuusaarneqarsinnaanngitsoq, inuit innarluuteqartut illersuisuat Anja Hynne Nielsen oqarpoq.
Paasititsiniaanermi politikerit inuit innarluuteqartut pillugit politikkiliornissaat anguniarneqarpoq. Politikki inuit innarluuteqartut immikkoortitaasarnerannik unitsitsiniaanermik siunertaqassaaq.
- Paasititsiniaanermi anguniagaq tassaaoq inunnut innarluutilinnut atugassarititaasut pitsanngorsarnissaat. Tamanna politikerinut kimigiisernikkut pissaaq.
Paasititsiniaanermik aallartitsisut isumaqarput sammisaq politikkikkut ukiuni arlalinni soqutigineqanngippallaarsimasoq.
Paquminarsaaneq unitsilli
Tilioq tusagassiorfinnut nalunaarutimini ilisimatitsissutigaa misissuinerit takutikkaat nunatsinni innuttaasut 15 procentii annerusumik minnerusumilluunniit aamma ersittumik ersinngitsumilluunniit innarluuteqartut. Misissuinerup aamma takutippaa innarluuteqartut pitsorluuteqartulluunniit immikkoortitaaneq misigikkajukkaat.
- Kalaallit Nunaat inunnut innarluutilinnut tunngasunik nunarsuaq tamakkerlugu pisussaaffiup malinnissaanut kinguarsimavoq. Taamaammat ersarippoq pisortatigoortumik annertuumik ukkatarinerunissaa suliassaqarfimmullu politikkikkut piumassuseqarfiginissaa, inuit innarluuteqartut illersuisuat oqarpoq.
Paasititsiniaaneq danskit paasititsiniaanerannit #enmillionstemmer-imit isumassarsiaavoq.
Paasititsiniaaneq Facebookimi maanna nammineq qupperneqalerpoq, inuit innarluuteqartut misigisaminnik avitseqatigiiffisinnaasaattut siunertaqarluni.