Sermersooq: Kommunerisanni internet aqqutigalugu aalajangeeqataagit
Kommuneqarfik Sermesooq innuttaasunik peqataatitsisarnermini alloriaqqissaaq, tallimanngorpat qarasaasiatigut tunngavissaq nutaaq, Kommuneqarfiga, atorneqalerpat.
Innuttaasunik peqataatitsinermi tunngavissaq nutaaq, Kommuneqarfiga, aqqutigalugu innuttaasut periarfissaqalissapput, oqaaseqaateqarnermikkut, taasinermikkut, salliutitsinermikkut allarpassuartigullu kommunip ineriartortinneqarneranut peqataanissamut.
Kommunimi Immikkut siunnersorti Anna-Sofie Hurup Skjervedal Sermitsiaq.AG-mut oqaluttuarpoq.
- Suliniutit tigussaasut, innuttaasunit isummerfigineqarlutillu oqaaseqarfigineqarsinnaasut aallaavigissavavut, taanna oqarpoq.
Ilisimatusarsimaneq tunngavigalugu suliniut
Suliniutit siulliit ilaat tunngavimmut ikkunneqartussaq tassaavoq, meeqqat inuusuttullu atugarliortut pillugit politikki nutaaq. Tassani innuttaaut susassaqarfimmut pitsanngorsaataasinnaasunik siunnersuuteqarsinnaapput, tamatuma kingorna siunersuutit tapersersorneqarnerpaat taasissutigisineqassapput. Isumassarsiat pitsaanerpaat politikkikkut sulianermut ilanngunneqartassapput.
Anna-Sofie Hurup Skjervedalip ilisimatusaatigisimavai innuttaasunik peqataatsitsisarneq, aamma innuttaasut ilarpassuisa qanoq peqataatinneqarsinnaanerat, pingaartumik inuusuttut innuttaasut nalinginnaasumik ataatsimiitsinneqarnerannut siulliullutik takkunneq ajortut qanoq peqataatinneqarsinnaanerat.
- Innuttaasut sumiiffiinut tikikkusuppavut, piffissarlu sumiiffillu apeqqutaatinnagit peqataatinneqarsinnaanerannik periarfissillugit, taanna oqarpoq.
Politikkikkut pingaarnersiuineq
Innuttaasut peqataatinneqartarnissaat kommunimi politikkikkut pingaartinneqartut ilagaat. Siunertaavoq, piffissaq ungasinnerusoq eqqarsaatigalugu innuttaasut tunngavik toqqaannartumik aqqutigalugu siunnersuuteqarsinnaanerat. Siunnersuutilli akuerineqassappata politikkikkut kissaataasariaqarlutillu kommunalbestyrelsimi amerlanerussuteqartuni akuerineqartariaqarput, immikkut siunnersorti erseqqissaavoq.
Suliniutit tamarmik kommuni ingerlatsivimmut attuumassuteqartunit ataqatigiissaarneqartassapput, innuttaasut isumassarsiaannik ilanngussaannillu ingerlatsitseqqinnissamik qulakkeerinnittussanit.