2014-mut aningaasanut inatsit
Sermersooq tapiissutinik pissarsinerussaaq
Aappaagumut sanaartugassanut aningaasaliissutit agguataarnerat maanna kisitsisalerneqarpoq. Kommuneqarfik Sermersooq pissarsinersaassaaq 863 millioner koruuninik pissarsissagami
Inissaaleqinerup akiorniarnera oqummit kinguarsarneqarpoq. Taamaammat aningaasaliissutit amerlasuut inissianik iluarsaanermut nutaanilu sanaartornermut atorneqassapput oqummik pissuteqartumik allamut nuuttariaqalersut inissaqartinniarlugit.
Inissiat amerlasuut sanaartorneqarput inissialli ilarpassui oqummik inissiallu aserfallassimanerannik pissuteqartumik allamut nuuttariaqalersunut attartugassanngortinneqartarput. Naalakkersuisut ilimasaarutigaat inissianik attartortitsisarneq pillugu allanngortiterinissaq attartortut inigisaminnik piginnittuulernissaat pilerinarsarniarlugu.
Kollegiat amerlanerit
Inissiat attartortunut tuniniarneqartussatut isumaliutigineqartut ilaat tassaapput Nuup ilaani Qinngutsinniittut. Taakku tuninerannit isertitat nutaanik sanaartornermut atorneqartussatut isumaliutigineqarput.
Ineqartunut tapiissutit aamma allanngortinniarneqarput inuit pisariaqartitsilluinnartut pissarsinerunissaat qulakkeerniarlugu.
Sanaartugassanut aningaasaliissutit maanna agguaanneqarput 2014-mi aningaasanut inatsisissatut siunnersuut aqqutigalugu. Aningaasaliissutit atorniarneqarput kommuunit naligiinnerusumik ineriartortinnissaannut. Taakku saniatigut aningaasat 238 millioner koruunit immikkoortinneqarput suli kommuninut agguaanneqanngitsut taakkulu inissiliornermut atorneqassapput.
Aningaasanut Naalakkersuisup Vittus Qujaukitsup immikkut tikkuarpaa Kommune Kujallermi innuttaasut ikiliartornerat illuanilli Kommuneqarfik Sermersuumi innuttaasut amerliartorlutik.
- Suliffissaaleqineq ineqarnikkullu atukkat apeqqutaalluinnartarput innutaasut kommuuninut allanut nuuttarnerannut, tamannalu qanoq iliuuseqarfigisariaqarparput, Vittus Qujaukitsoq oqarpoq.
Taamaammat Qaqortumi aamma Ilulissani kollegialiornissamut aningaasaliisoqarpoq. Aammattaaq Paamiuni Nuummilu kollegialiortoqarnissaa siunniunneqarpoq.
Sanaartugassanut aningaasaliissutit imatut agguataarneqarput:
Qaasuitsup Kommunia 373,3 millioner koruunit
Qeqqata Kommunia 125,8 millioner koruunit
Kommuneqarfik Sermersooq 863,1 millioner koruunit
Kommune Kujalleq 221,9 millioner koruunit