Sermersooq: Unioqqutitsilluni isertoqarsimanera isumaginninnermut tunniuttakkanik kinguaattoortitsivoq
Namminersorlutik oqartussat qarasaasiarsorneranut unioqqutitsilluni isertoqarsimanerata pisortat aningaasaqarneq pillugu systemiat ajornartorsiutippaa, Kommuneqarfik Sermersooq ilisimatitsivoq.
Namminersorlutik Oqartussanit tallimanngormalli nalunaarutigineqarpoq, unioqqutitsilluni isertoqarsimanerata kinguneranik itk-kkut annertuumik ajornartorsiuteqartoqartoq.
Kommuneqarfik Sermersuumit marlunngornermi ilisimatitsissutigineqarpoq, kommunimi isumaginninnermi tunniuttakkanut ajornartorsiutit kingunerluuteqartut.
- Namminersorlutik Oqartussat serveriinut unioqqutitsilluni isertoqarsimanerata kinguneraa, pisortat aningaasaqarneq pillugu systemiisa attaviannik nunatsinniit nunattalu avataaniit attaveqaatit matuneqarnerat.
- Tamanna ilaatigut isumaqarpoq, pisortat isumaginninnermi tunniuttagaat tunniunneqarsinnaannginnerinik, tunniunneqartartullu aatsaat attavineqqinnermi tunniunneqartussanngorlutik. Taamaasilluni Suliffeqarnermut Isumaginninnermullu Ingerlatsiviup paasissutigereersinnaavaa ikiorsiissutit tamangajalluinnarmik kinguaattoorlutik tunniunneqarumaartut, aamma attaveqaatit aaqqinneqaraluarpata, kommuni nittartakkamigut allappoq.
Kommuneqarfik Sermersuumit ilisimatitsissutigineqarpoq, attaveqaatit qaqugu pilersinneqaqqissanersut maannakkuugallartoq ilisimaneqanngitsoq:
- Taamaattorli ikiorsiissutit tunniunneqarsinnaaleriarpata sukkanerpaaq atorlugu isumaginninnermut tunniunneqartartut tunniunneqarumaarput, kommuni allappoq.