Sermersuit ilimagisamit qajannarnerusut
Iluliarsuit ilimagisamit silap pissusianit sakkortuumit eqqugaanerusarput, DMI naapertorlugu misissuinerup nutaap tamanna takutippaa. Tamanna immap qaffakkiartuinnarneranik kinguneqarsinnaavoq.
![Sermersuit ilimagisamit qajannarnerusut Indlandsisen](https://image.sermitsiaq.ag/104476.webp?imageId=104476&width=960&height=1280&format=jpg)
Nunatta sermersua tamarmi Sikuiuitsumilu kujallermi sermeq tamarmi aakkiartussagaluarpata immap qaffasissusia 65 meterinik qaffassagaluarpoq.
Ulloq manna tikillugu isumaqartoqarsimavoq sermersuup aakkiartornera uninngaannartoq, paasisalli nutaat tamanna allanngortippaat.
DMI taama allappoq:
- Nunat tamalaat akornanni misissuinerup nutaap, sermersuarmik immikkut ilisimasalinnit 29-nit University of Lincolnimit siulersorneqartup, sermersuup aakkiartornera siornatigut isumaqarfigineqartutut arriitsiginngitsoq takutippaa. Silarlupilunnerit sivisuallaanngitsunik sivisussusillit aakkiartornermut sunniuteqangaarsinnaapput — maannakkumuinnaanngitsoq, aammali siunissamut, DMI allappoq.
Taamaattumik immap qaffakkiartornera ilimagisamit sukkanerusumik pisinnaavoq, tamannalu pillugu misissuisoqarnerusariaqartoq, Ruth Mottram, DMI-mi Nationalt Center for Klimaforskningimi silap pissusianik ilisimatooq serminillu misissueqqissaartartoq, misissuinermilu atuakkioqataasoq, oqarpoq.
Qaanngorsuaq nunguttoq
2022-mi silap pissusaa sakkortooq pisoq, Sikuiuitsumi kujallermi qaanngorsuup Conger sivisuumik kiassuup ataani isugutserujussuareerluni nungunnera, DMI-p assersuutitut taavaa. Sikuiuitsup kujalliup kangiani qanittukkut assingusumik pisoqarsimavoq:
- Pisuni taakkunani marlunni sermersuaq aakkiartupiloorpoq, kiannerulerneralu piffissami killilimmi pigaluarluni qereqqissinnaanngilaq. Tamanna sikunut tamarmiusunut immallu qaffasissusianut aalajangiisuusinnaavoq, DMI naapertorlugu Ruth Mottram oqarpoq.