Sermersuup kviksølveqarnerujussua misissuinerup nutaap illuatungilerpaa
Misissuinerup nutaap takutippaa Kalaallit Nunaanni sermersuup aakkiartornerani imeq annikitsuinnarmik kviksølveqarnersoq.
Ilisimatuut allaaserisami Science Advances-imi saqqummersumi uppernarsarpaat Kalaallit Nunaata sermersuata aakkiartornerani erngup kviksølveqarnera pillugu misissuinerup tupaallannartup inernera inerniliuteqqinneqarsinnaanngitsoq, aamma Kalaallit Nunaata sermersuata aakkiartornerani erngup ilimagisamit kviksølveqarneruneranik takussutissaqanngitsoq.
Danmarks Geologiske Undersøgelser for Danmark og Grønland (GEUS) aamma Aarhus Universitet (AU) misissuinerup saqqummiunneqarneranut atatillugu tusagassiuutinut nalunaarummi taama allapput.
Suliffeqarfiit 2021-mi allaaserisami tupaallannartumi Kalaallit Nunaanni Danmarkimilu ernumalersitsisumik allaaserisamut innersuussipput, tassanilu inerniliunneqarsimagaluarpoq sermersuup aakkiartornerani imeq annertuumik – manna tikillugu takuneqarsimanngitsumik – kviksølveqartoq.
- Misissuineq siulleq tupaallaatigineqartorujussuuvoq, tassanimi nalunaarutigineqarpoq kviksølvimik akoqarnera aarlerinaatilimmik annertusoq. Uuttortaanerit takutippaat Kalaallit Nunaanni imeqarfimmi nalinginnaasumik akoqartarneranit 100-1000-eriaammik annertunerusoq, Christian Nyrop Albers, GEUS-imi Avatangiisinut Geokemikeri oqarpoq.
Pinngortitami nassaassaasoq
Misissuinerulli nutaap tamanna allaalluinnartoq takutippaa:
Misissuinerit tamarmik takutippaat imeq literimut 1 nanogramimik kviksølveqarnerusoq, tamannalu aarlerinarnerunngilaq:
- Nanogramimik ataatsimik literimut uuttuineq pinngortitami nalinginnaasumik akuussuseqartarneranit annertutiginngilaq, Christian Nyrop Albers oqarpoq.
Taamaattumik navianaataa killeqartoq, Christian Juncher Jørgensen, misissuinermi ilisimatusartartoq, nassuiaavoq:
- Misissuisimanerput naapertorlugu imaq sermersuup ataaniittoq kviksølvimik akoqarpianngilaq. Taamaattumik inuiaqatigiinnut Kalaallit Nunaannilu pinngortitamut ulorianaat annikitsuararsuuvoq, Christian Juncher Jørgensen, AU-mi seniorforsker oqarpoq.
Allaaserisamik suliaqartut oqarput misissuinermi siullermi kviksølveqarneruneq nassuiarsinnaanagu, naliliippulli misissukkat mingutsinneqarsimasinnaasut.