Sermitsiap atuagassiaq qallunaatooq unitsippaa
Sermitsiap atuagassiaq "SQ Danmark" unitsippaa, taarsiullugulu internetimi suliniutissanut nutaanut suliniuteqalerluni.
Atuagassiaq "SQ Danmark" apriilimi saqqummersinneqartoq ataasiaannavilluni saqqummerpoq. Aqutsisut atuagassiap unitsinnissaa aalajangerpaat, Danmarkimi allagassiussisarnermik ingerlatsiviit naatsorsuutigisamut sanilliullugulu appariangaatsiarsimanerat pissutigalugu. Atuagassiaq apriilimi saqqummerpoq, sermitsiamullu 125.000 kr.-inik akeqarsimalluni, aaqqissuisuuneq Poul Krarup ilisimatitsivoq. Taassumalu SQ Danmarkip ingerlatiinnarnissaanut allagassiussisarnermut ingerlatsiviit nalorniartortaqarpallaartut.
– Allagassiussisarnermik ingerlatsiviit taamak annertutigisumik appariarnissaat uagutsinnut tupaallaataasimavoq. SQ Danmark isumassarsiatsialaasoq suli isumaqarugut, kisianni nutaanik allagassiisarfinniki ujaasisariaqarpugut, Poul Krarup oqarpoq. Taassuma erseqqissarpaa SQ Kalaallit Nunaat ingerlaannassasoq.
Poulip innersuussutigaa, qallunaat aviisiini ullormut saqqummersartuni unammilleqatigiinneq sakkortoorujussuusoq, allagassiussassat akii 75.000-iniit 25.000 kr.-inut appariarujussuarsimallutik. Assersuutigalugu Nyhedsavisen-ip allagarsiussat quppernerit ilivitsut 10.000 kr.-ilerlugit tuniniartarai, tamannalu tusagassiorfinnik ingerlatsisuni ingasalluni appasippoq.
Sermitsiami aqutisut SQ Danmarkimut taarsiullugu nukiit suliniutinut nutaannut atorniarpaat, pingaartumik internetimi, Poul Krarup ilisimatitsivoq.
– Niuffaffimmi pilersitsinissamik pilersaaruteqarpugut, internetimi quppernermi ilusilersugaq nutaavik. Saniatigut aamma net-TV-mik annertusaaniarpugut sulisussarsiortarfimmillu pilersitsiniarluta, aaqqissuisuuneq nalunaarpoq. Taassuma SQ-mik misiliut akisusimagaluaqisoq aviisip aningaasaqarnikkut siuariartornera nuannaarutigaa.
– Sermitsiaq nukittumik aaqqissuisoqarnermigut tuniniaasoqarnermigullu tusagassiornikkut niuernikkullu iluatsilluarsimavoq, Poul Krarup Sermitsiap ukiuni 50-inngortorsiorluni Nuuk Ugeaviisillu ukiunik 25-inngortorsiorluni nalliuttorsiorneranut atatillugu oqarpoq.
Sermitsiaq ataatsimut isigalugu aningaasaqarnikkut ingerlalluarpoq. Kalaallit Nunaanni allagassiussisarnikkut tunisisarnerit amerliartorput, pingaartumik aviisimut, kisianni internetimi aviisi malinnaajartorusaarpoq. Aqutsisut Sermitsiap ukioq manna 20 millioner kronenik isertitatigut kaaviiaartitaqarnissaa missingersuusiorsimavaat, tassa 4 millioner kronenik qaffariaateqarnissamut naapertuuttumik. Poul Krarup naapertorlugu naatsorsuutit missingersuutiniit qaffasinnerusussatut isikkoqarallarput.