Sermitsiaq isumaqarpoq: Aalisarneq ingerlanerliorpoq, sumulli ingerlava
Inuiaqatigiit ukiorpassuarni aalisarnerup iluarsaateqqinneqarnissaanik ujartuisimapput. Nunanni inuussutissarsiutit pingaarnersarimmassu. Aalisarneq avammut niuernermut suliffissaqartitsinermullu pingaaruteqarpoq siamasissumillu nunassitsitsersimanitsinnut tunngaviulluni. Aalisarnerup iluarsaateqqinneqarnissaa inuiaqatigiinnut tamanut sunniuteqassaaq taamalu aningaasaqarnermut, suliffissaqartitsinermut nunassitsiternermullu sunniuteqassalluni. Naalakkersuisulli aalisarneq qanoq piniarneraat ilisimanngilarput. Sunik takorluuisoqarpa? Qinigassat annertuut sunniutissaat, qinersinngitsoornerullu sunniutissai naalakkersuisut ilisimavaat?
Aalisarnermi qanoq isigineqarnersoq apeqqutaalluinnarpoq. Nunanut allanut niuernerup niuerfinnilu unammilleqatigiinnerup tungaaniit isigigutsigu aalisarneq sapinngisamik atorluaanikkut ingerlanneqartariaqarpoq. Imaappoq aalisartitseqatigiiffiit angisuukkuutaat, nammineq tunisassiorlutik toqqaannartumik tuniniaasartut. Tunisassiornerit allat inerisaaqqissaarnerillu akikinnerpaamik sulisussaqarfiusuni ingerlanneqassapput. Sinerissap qanittuani aalisarneq taamaallaat sumiiffimmi pilersuinermut atorneqassaaq, soorunalumi aamma ajornartinnagu aalisakkanik nutaanik avammut nioqquteqarnermut atorneqarsinnaalluni. Aalisarnerli suliffissaqartitsinerup tungaaniit isigigutsigu, nunassitsiternermullu tunngaviusutut isigalutigu, taava eqqarsaatigisassat allarluinnaat eqqarsaatigisariaqassapput.
Taava nunatsinnut tulaassisoqartassaaq, tunisassiortoqarluni inerisaaqqissaartoqarlunilu, sapinngisamik sumiiffinni amerlasuuni. Taava pilersaarusiornissaq aqutsinissarlu pisariaqassapput. Pisortat tunitsivinnut aningaasaliisariaqassapput, sinerissap qanittuani aalisarneq inerisartariaqassaaq, tulaassat sumiiffinni inerisaqqissaarneqartassapput sumiiffinni avammullu nioqqutissatut. Taava pisortat aningaasaliisariaqassapput aammalu tulaassat pisassallu aqunneqartariaqassallutik. Aalisarnerulli ilaa aamma niuernermi ingerlaaseq tunngavigalugu ingerlanneqarsinnaavoq pisassat tunineqarsinnaallutik tunitsivigiumasanullu tulaassisoqartarsinnaalluni.
Pisassat ilaat qanoq atsigisut suliffeqarfiit namminneq pisassaneraat kisimi aqunneqartarluni. Ilaatigut piginnittuusarneq sapinngisamik siammarterumallugu, nutaanik aalisartunngortoqartarnissaa aalisartullu utoqqaat aalisartuujunnaartarnissaat periarfissikkumallugit. Taamaaliornikkullu aamma pisassat sumiiffinni aalisartunut aalisartarfinnullu assigiinngitsunut agguataarneqarnissaat qularnaarneqassaaq. Niuerfinni pissutsit aalajangissavaat aalisakkat sorliit aalisarneqartassanersut, kikkunnut tunisisoqartassanersoq, kina avammut niuertuussanersoq aalisakkallu qanoq akeqartassanersut.
Taamatullu aamma killilersuinertaqanngitsumik ingerlatsisoqarsinnaavoq, pisassanik killilersuisoqarani killeqanngitsumillu tunisisoqarsinnaalluni. Qularnanngilluinnarpoq taamaaliornikkut aalisartitsivissuit angisuut kisimik aalisartuulissasut. Nunatsinni tunisassiortoqarunnaassasoq aalisarnerlu nunatsinni suliffissaqartitsiujunnaangajassasoq. Sumiiffinni aalisartut nunatsinni tunisassanik aalisartut kiserngorutissapput. Taamatut aaqqissuussisoqarpat apeqqutaalissaaq inuiaqatigiit qanoq ilillutik akileraarutit isertitallu akitsuutaat aqqutigalugit pissarseqataasarsinnaanersut? Inuiaqatigiilli ilisimasariaqarpaat nunatsinni inuussutissarsiutit pingaarnersaat naalakkersuisut qanoq piniarneraat. Tassanimi pineqarpoq suliffissaqartitsineq nunassitsiternerlu imaluunniit suliffeqarfiit angisuut akileraarusiuiffigineqartussat isertitaqarnissaat pineqarpa?
Ilisimasariaqarportaaq namminersortut avataasiorlutik aalisartut inuusunnerusunit taarserneqartussaammata. Taakku angisuunik akisoorsuarnik kilisaataateqarput nunanut allanut tunineqarlutik aalisarunnaassagaluarnik nutaanik taarseruminaatsussanik. Naalakkersuisunut piumasarisariaqarparput aalisarnerup qanoq pineqarnissaa pillugu erseqqissumik ilisimatinneqassasugut, inuussutissarsiut siunissaqaqqullugu ineriartornissamullu periarfissaqaqqullugu.