Sethip qanoq pineqarnissaa marlunngorpat aalajangerneqassaaq
Kalaallip inuunini naallugu parnaarussap Seth Sethsenip marlunngorpat paasissavaa misiligummik iperagaassanerluni
Glostrupimi Eqqartuussiviup marlunngormat juunip 26-ianni isummerfigissavaa kalaaleq inuunini naallugu parnaarussaq misiligummik iperagaassanersoq, taamatut paasissutissiivoq Ritzau.
Ippassaq eqqartuussinermi Seth Sethsen ulorianassutsiminut nalilersitsikkusunngilaq, eqqartuussissuserisualu malillugu tamanna misiligummik iperagaanissamut periarfissaanut annikillisitsivoq.
Atuaruk"Seth sianissutsimigut misissortikkumanngilaq"
- Arfineq-marloriarlunga tarnikkut misissortittarsimavunga, Pinerluuteqarsimasunilli Isumaginniffiup misissuinerit piumasaminik paasisarpai. Ulorianartutut taavaannga, tarnip pissusianik ilisimasallit taamatut oqanngikkaluartut, Seth Sethsen eqqartuussinermi oqarpoq.
- Rockerininngarnit ajortuliaqarneruvusi, ersarissumik kamalluni oqarpoq.
Atuaruk "Isumakkeerfiginngisaannassavakkit, Seth"
Eqqartuussisup Anne-Marie Boysenip isummerfigissavaa Seth Sethsen misiligummik iperagaassanersoq.
Inuuneq naallugu parnaarussaasut agguaqatigiissillugu ukiuni 15-16-ini parnaarussaaqqasarput. Seth Sethsen Naalagaaffeqatigiinni maanna sivisunerpaamik parnaarussaaqqasimavoq. Ukiuni 26-ni parnaarussaaqqavoq, politiimik toqutsisumit Palle Sørensenimit, sivisunerpaamik ukiuni 33-ni parnaarussaaqqasimasumit, ukiunik arfineq-marlunnik sivikinnerusumik.