Sethsen misiliummik anisinneqassanersoq Eqqartuussiviit qullersaanni aalajangiiffigineqassasoq

Seth Sethsen inuunini naallugu parnaarussassanngortinneqarsimasoq, ukiut 36-t sinnerlugit parnaarussaaqqareersoq misiliummik anisinneqassanersoq Eqqartuussiviit qullersaannit isummerfigineqartussanngorpoq.

TV 2 Lorry, toqutsisimasutut pineqaatissinneqarsimasup eqqartuussissuserisuanik Henrik Stagetornimik oqaloqateqarsimasoq taamatut allappoq.

Maalaarutinik sulianik aalajangiisartut tamatuma Eqqartuussiviit qullersaanni suliarineqarnissaa akuersissutigisimavaat. Pinerluuteqarsimasunik isumaginnittoqarfik parnaarussap 66-inik ukiullip iperagaannginnissaanik isumaqartoq tamatumannga piumasaqarsimavoq.

Østre Landsret siorna decembarip qaammataani aalajangiisimavoq, Pinerluuteqarsimasunik isumaginnittoqarfik Seth Sethsenip misiliummik anisinneqarnissaanut piumasaqaatinik aalajangersaassasoq.

Henrik Stagetornip Ritzau-imut oqaluttuaraa, Eqqartuussiviit qullersaanni Seth Sethsenip misiliummik anisinneqarnissaa anguniarniarlugu.

1985-imili parnaarussaaqqasimasoq

- Nunap eqqartuussisuuneqarfiata aalajangiisimaneranik tamanna aalajangiinerussaaq, eqqartuussissuserisoq oqarpoq.

Taassuma naatsorsuutiginerarsimavaa, suliaq qaammatit marlussuit ingerlaneranni Eqqartuussiviit qullersaanni suliarineqarumaartoq.

Seth Sethsen 1985-imili parnaarussaaqqasimavoq. Ataataa danskiuvoq anaanaalu kalaaliulluni, Danmarkimilu alliartorsimalluni.

1985-imi taxartartoq aallaallugu Albertslundimi toqussimavaa.

Seth Sethsen taamanikkut 30-nik ukioqartoq ullualuit qaangiummata toqutsisimasutut tigusaasimavoq. Taxartartoq Kurt Gaarn-Larsen toqussimallugu nassuersimalluni.

Namminerli nassuiaasimanera naapertorlugu, ujajaaniarnermini uivertoqarneranut atatillugu ajutoornikkut marloriarluni igissimalluni.

Eqqarsartaatsimigut misissorneqarusussimanngitsoq

Eqqartuussiviit qullersaanni ilaatigut apeqqutit tunngaviusut pillugit suliassat aamma inatsisitigut atugassarititaasut erseqqinngitsut suliarineqartarput. Suliami matumani immikkuullarissuusoq tassaavoq, Seth Sethsenip eqqartarsartaatsimigut misissortikkusussimannginnera.

- Eqqarsartaatsikkut misissuisoqarsimannginnera pingaaruteqarnersoq apeqqutaavoq, Stagetorn oqarpoq.

Nunap eqqartuussisuuneqarfiata misiliummik anisitsisoqarnissaanik suliaqartoqassasoq decembarimi aalajangiinnginnerani, Seth Sethsen anisinneqarnissaminik arlaleriarluni qinnuteqartaraluarluni itigartinneqartarsimavoq.

Suliaq Østre Landsret-imi suliarineqarmat, Pinerluuteqarsimasunik isumaginnittoqarfiup eqqartuussissuserisuata Camilla Skadborgip oqaluttuarisimavaa, Seth Sethsen ukiorpassuarni suleqatiginnikkusussimanngitsoq. Tamannali seth Sethsenip ilumuunnginnerarpaa.

- Suleqatiginnikkusussimanngitsutut oqaatigineqarnera ilumuunngilaq, eqqartuussivimmi apersorneqarami ilaatigut taamatut oqarpoq.