SIK aningaasanut inatsimmik isumaqatigiissut pillugu: Pitsaasortaqarpoq pilersaarutinilli tigussaasunik amigaateqarpoq
Nunatta karsianut isertitassat nutaat sumiinnersut kattuffimmi siulittaasup takusinnaanngilaa.
Inuit Ataqatigiit, Siumut, Naleraq, Atassut attaviitsorlu Knud Mathiassen sapaatit akunnerani qaangiuttumi 2024-mut aningasanut inatsisissamut atsioqatigiipput. Isumaqatigiissummi pingaartumik peqqinnissaqarfik sammineqarpoq, tassunga aningaasaliissutit amerlinerat 114,5 million koruuniullutik.
Isumaqatigiissut ajunngitsortaqarpoq, SIK-mili kattuffimmi siulittaasup Jess G. Berthelsenip takujuminaatsippaa, ilaasortami pisisinnaassusaat inuunerminnilu atugaat 2024-imut aningaasanut inatsimmik isumaqatigiissummi qanoq pitsaanerulersinneqarniarnersut.
- Amerlanerit nunamit aallartarnissaat pinngitsoortittariaqarparput, tamatumunngalu aaqqiissusissamik takusaqarsinnaanngilanga.Tamanna taamaallaat pisinnaavoq Kalaallit Nunaanni isertitat amerlinerisigut, takusinnaanngilaralu ilaasortatta pisisinnaassusaat isumaqatigiissummi qanoq pitsanngoriassanersoq, kattuffimmi siulittaasoq oqarpoq.
Qaanaami inissiat
2024-mut aningaasanut inatsimmi illoqarfinni mikinerusuni inissialiortitsinerit, pingaartumik illoqarfinni nunaqarfinnilu inuusuttunut inissialiortitsinerit aallunneqarnerussapput, inissianik Upernavimmi, Uummannami aamma Qaanaami sanaartornerit nanginneqassallutik. Kingullertut taaneqartumi inissiat marluk attartortittakkat saneqarnissaat aalajangerneqarsimavoq. Tamanna namminermini ajunngilaq - annikippallaarlunili, siulittaasoq isumaqarpoq.
- Ukiuni kingullerni marlussunni arlaleriarlunga Qaanaamiissimavunga, inissianullu atatillugu ajorluinnarpoq, inissiammi annerusumik minnerusumilluunniit isaterneqartariaqarput. Taamaattumik inissianik nutaanik sananeq ajunngilaq, marluinnaalli aningaasanut inatsimmi siunnersuutigineqarnerat naammanngilluinnarput.
2019-imi Avannaata Kommuniata naatsorsugai naapertorlugit innuttaasut tallimaagaangata ataaseq inissiamut utaqqisuniittarpoq. Kommunimi nakkutilliinermi nalunaarusiat takutippaat Qaanaami kommunip attartortittagai tallimaagaangata marluk ukiut qulit ataallugit atasinnaassuseqartoq inissiallu attartortittakkat tallimaagaangata ataaseq ukiut tallimat ataallugit atasinnaassuseqartartut.
