politianmeldelse
SIK: Filippinerit sulisut pillugit pinngitsaaliinermut suliaq siulliunngilaq
SIK-p nunanit allanit suliartortut sulinissamut akuersissuteqartut nunatsinnut tikilluaqqullugit, Jess G. Berhelsenip oqaatigaa. Arlaqartut kattuffimmut ilaasortaapput.
Aappariit Ann Rosselip aamma Robert Manzanillap sutorniartarfimmi 'Bones'-imi pisortaq pinngitsaaliillunik akiliisitsiniarnermut tunngasumik politiinut unnerluutigaat. Taakku najugaqarnissamut akuersissut nutarterniarunikku aamma qaammammusiatik tiguniarunikkit tusintilikkaanik akileeqqaartariaqarlutik paasitinneqarsimapput.
SIK-mi taamatut ajornartorsiuteqartoqarneranik naammattuuereersimapput.
Ajoraluartumilli sulisitsisut taamatut atornerluiniartarnerat SIK-mi takornanngilarput, pingaartumik sulisitsisut Sulisitsisut Kattuffiinut ilaasortaaffeqanngitsut akornanni, tamanna ingerlatsinermi atorneqarniartarpoq, SIK-mi siulittaasoq Jess G: Berthelsen tusagassiuutinut nalunaarummi allappoq.
Sulisartut kattuffia nammineerluni suliamik assingusumik suliaqarpoq.
- Assersuutigalugu ilaasortatsinnut Filipinerineersunut allanut tunngatillugu eqqartuussivitsigoortillugu suliakkiuteqarnissaq maanna suliaraarput. Eqqartuussivikkoortitsisariaqarpugut pissutigalugu sulisitsisut tamakku Sulisitsisunut isumaqatigiissuteqarfigisatsinnut ilaasortaanngimmata, taamalu taakkununnga ajornannginnerulluni sulisartunik atornerluinissaq.
Filippinerit sulisartut Nunatsinni aamma SIK-mi tikilluaqqusaasut, Jess G. Berthelsenip peqatigisaanik naqissuserpaa.
- Naggataatigut una naqissuserlugu SIK-miik oqariartuutigerusupparput. Pissusissamisuunngitsutut isigiuarparput maanga nunamut nammineq suliartortitatsinnik asissuinersuaq.
- Eqqaamallugu, uagunukua nammineq tikisitagut, taava tikiseriarlugit asissussanngilagut, taakkuami sulisartut sulisitsisuninngaanniik tikisinneqarput, sulisartullu maanga tikittut allatulli sulisartoqatigaagut, sutigullu tamatigut aamma ikioqquppata ikiortussaavagut.