SIK: Isumaginninnermut Aningaasaateqarfiup ataatanngortussat angalanerat akilertassavaa
Anaanaasoq illoqarfimmut allamut aallarluni erniartortariaqartillugu, ataatanngortussat SIK-p Isumaginninnermut Aningaasaateqarfianut angalanermut aningaasartuutinut akiliunneqarnissaminnik qinnuteqarsinnaanngorput.
Ataatanngortussanut nutaarsiassatsialaqarpoq.
- Matumuuna nuannaarutigalugu nalunaarutigissavarput SIK-p Isumaginninnermut Aningaasaateqarfiata anaanaasut sinerissamut aallarlutik erniartortariaqarnerini ataatanngortussat angalanissaannut akiliussinnaanngormagit.
SIK tusagassiuutinut nalunaarummi taama allappoq.
Aappariillu 18-it inorlugit ukiulinnik meeraqarunik, angalanermut aamma akiliunneqarsinnaasut ilanngullugu oqaatigineqarpoq.
Akissarsiassaraluanik annaasaqaatit ineqarnerlu
Tamanna isumaginninnermut aningaasaateqarfimmut qinnuteqarnikkut pisinnaavoq – malugalugu angalanermut tunngammat, SIK naqissusiivoq.
Piffissap ingerlanerani naliliiffigineqarumaarpoq aamma akissarsiassaraluanik annaasaqaatinut ineqarnermullu tapiisoqartalissanersoq.
Kisianni, kattuffik ima allappoq:
- Tassa aallaqqaaammut taamaallaat angalanermut aningaasartuutit periarfissaq nutaaq, SIK-p isumaginninnermut aningaasaateqarfiata maanna ammagaa atorlugu akiliussisoqartalissaaq.
SIK pisarnertut aamma ukioq manna ilaasortat akornanni sulinngiffeqarluni angalanissanut nalinginnaasunut makitsissaaq, qinnuteqarnissamut piffissarititaq sivitsorneqarpoq. Qinnuteqaatit maanna nittartakkatigut taamaallaat pisussaanerat pissutaatinneqarpoq, aammalu SIK Feeriarnermut Aningaasaateqarfiata isumaqatigiissutit nutaat malillugit allanngortinneqaleruttormat.