SIK: Kommunini toorlattunik suli soraarsitsisoqartarpoq
Sulisartut kattuffiata SIK-p kommunini sulisoqarnikkut suliassanik ingerlatsineq pitsanngorsimanersoq apeqquserlugu isornartorsiuivoq. Soraarsitsinerit tunngavilersorneqanngitsut suli SIK-mit suliarineqartarput.
Kattuffiit arlallit 2020-mi ilaasortaminnut kommunini atorfininnerminni atugaasa pitsanngorsarneqarnissaannik kajumissaaruteqarnerup kingorna, kommunini sulisoqarnikkut suliassanik suliarinnittarneq pitsaanerulersimanersoq SIK-mit misissorneqarpoq.
Kommunini sulisut pillugit sulianik suliarinnittarnerup qanoq pitsaanerulersimanera akiuminaattoq, SIK isumaqarpoq.
- Kommunit sulisoqarnermut tunngatillugu suliaqartarnerminni suli iluarsiniagassaqarput, SIK-mi inatsisileritooq Bjarne Petersen naliliivoq.
Tunngavilersorneqanngitsumik imaluunniit amigartumik tunngavilersukkamik soraarsitsisoqartarnera, kattuffiit sisamat 2020-mi oqaatigaa, sulisut suliani tusarniaanermut akissuteqarnissamut periarfissinneqartanngillat, aamma sulisunut kinguneritinneqartartut sakkortuallaarsinnaasarput.
Suli taamatut pisoqartartoq
Sulisitsisut tassa kommunit sulisut pillugit sulianut tunngatillugu toorlattumik iliuuseqartarnerat akulikippallaartoq, SIK naliliivoq. Taamaammat SIK-mi inatsisileritooq kommunini sulisoqarnermut tunngatillugu pitsanngorsaasoqarnissaanik kaammattuuteqarluni allagaqarpoq.
- SIK-p paasisimavaa suliffeqarfinni ataasiakkaani il.il. pisortaasut soraarsissamaalikkaminnik tusarniaanngitsoorajuttut. Pisunilu taamaattuni erseqqissumik oqaatigineqarsinnaaneq ajorpoq suliffeqarfimmi pisortaasup aalajangiinnginnerani kommunip sulisoqarnermut immikkoortortaa qanoq akuutinneqarsimatiginersoq, SIK nittartakkamini allappoq.
Sulisut tusarniaanernut peqataatinneqaraangata, tusarniaanerit amigartumik pisartut SIK isumaqarpoq.
Tunngavilersuilluartannginneq
Kattuffik ilaasortanit tunngavilersuutitaqanngitsunik soraarsinneqarsimasunit suli saaffigineqartartoq, SIK nangilluni allappoq. Tassani SIK-mit kommuninut kajumissaarutigineqarpoq sulisoqarnermut immikkoortortaqarfiup soraarsitaasoqartillugu tamatuma sumik pissuteqarnerata sukumiisumik nassuiarneqartarnissaa qulakkeerniarneqassasoq.
- Soraarsitsinerit aalajangiinernut pisortani suliassat suliarineqartarnerat pillugu inatsimmi pineqartunut ilaapput, taamaattumillu soraarsitsinerup sumik pissuteqarnera allakkatigut sukumiisumik nassuiagassaavoq, tamanna oqaatigineqarpoq.
Soraarsitsinerillu ilaatigut mianersoqqusinertaqanngitsumik pisartut, SIK-p misissuinerata kingulliup takutippaa.
SIK-mit allakkami naggasiullugu erseqqissarneqarpoq, soorunami aamma sulisut akisussaaqataammata kommunip suliffeqarfiutaani sulinermi atugassarisat pitsaasuullutillu torersuunissaannut.