SIK-p namminersortunngorsaaniarneq isumaqatiginngilaa
Sulinermik Inuussutissarsiortut Kattuffiata SIK-p innuttaasunik sullissinerup ajorseriarnissaa ernummatigaa Namminersorlutik Oqartussat piginneqatigiiffiutaat namminersortunngussagaluarpata.
Naalakkersuisut siulittaasuata Kuupik Kleistip marlunngornermi tusagassiortunik katersortitsinermi erseqqisaarpaa tunisassiorlutik piginneqatigiiffiit namminersortunngorsarneqarsinnaasut. Taamaattoq Tele, Nukissiorfiit Pilersuisoq, Nuna Oililu pinnagit.
Kuupik Kleistip aamma eqqaavaa politikkimik ingerlatsineq inuussutissarsiuteqarnerlu imminnut qanittuararsuummata arlalitsigut ilaquttanik iluanaartitsiniaanernik, peqquserlunnernik ikinngutersornerillu pisuutitsiniutaasartut.
SIK-ip siulitaasuata Jess G. Berthelsenip, Kuupiup namminersortunngorsaaniarnera isumaqatiginngilluinnarpaa.
– Namminersorlutik oqartussat suliffeqarfiutaat privatinngorsarneqarsimasut misilittagaqarfigipiluppagut, ilaatigut inuiaqatigiit kiffartuunneqarnerata ajorseriarneranik kinguneqartarmata, aammalu ersittorsuarmik nepotisme annertuumik taakkunani atorneqarpoq, aammalu annertuumik avataaninngaannik tikisitat sulisorineqalersimallutik, Jess G. Berthelsen Kuupik Kleistip tusarliussaanut oqarpoq.
Danskit misilittagaat qiviaqquai, DSB suli nalagaaffimmit pigineqarpoq, naak Danmarki aqqusineqarfissuugaluartoq aamma SAS nalagaaffinnit pingasunit pigineqartoq eqqaasitsisutigalugu.
Sulinermik inuussutissarsiortut siulittaasuat isumaqarpoq, nunatsinni nunap immineq pissusaata pisariaqartikkaa namminersorlutik oqartussat suliffeqarfinnik piginnittuunissaat.
– Maannakkut nunarujussuarput taamatut siammasissumik inoqartoq akuerisimagutsigu Namminersorlutik oqartussat suliffeqarfinnik anginerusunik peqarnissaat pinngitsoorneqarsinnaanngilluinnarpoq, taamatummi ilaatigut allatut ajornartumik sumiiffiit ilaanni aalisakkerivinnik tuniniaavinnik akilersinnaanngikkaluanik ingerlatsisariaqassagatta nalinginnaasumik inuiaat sumiiffinni ataasiakkaani ingerlasinnaaqqullugit, Jess G. Berthelsen oqarpoq.