Sikulluni ukiornissaanut nannut marluk piareersartut
Kattegat-imi misiligaalluni immami angalasarfimmi sikusiutit marluk motoritik kissassissavaat.
Qanittukkut unnuakkut Hvide Sande aatsaat taama issitsigaluni 21,5 gradinik issippoq, maannalu København-imi tatsini sukuutsernissaq ajornarunnaarsinneqarpoq.
Naalagaaffiup sikusiutai marluk Isbjørn aamma Danbjørn Frederikshavn-imi angerlarsimaffeqartut sikulluni ukiorluunissaanut piareersarneqaleruttorput, Ritzau allappoq.
Isbjørn-ip motorini aallartissimavai, marlunngormallu nalunaaqquttap akunnerini arfinilinni Kattegat-imi misiligarneqarluni. Umiarsuaq assinga Danbjørn pingasunngorpat aamma taamatut piareersarneqassaaq, Søværnets Operative Kommando nalunaarpoq.
'Nannut' taakku marluk 1996-ip kingorna Danmark-ip imartaani angalasimanngillat. Misiligaalluni angalanermi umiarsuit motootii misilittarneqassapput, umiarsuit sikusiornermut atortui ilanngullugit. Tamatumunnga atatillugu misiligaalluni angalanerni umiarsuit inuttaasa atortut atornissaat sungiusassavaat.
- Umiarsuit sikusiutit pisariaqartitsineq malillugu aserfallatsaalineqartarput, atorneqannginnerminni. Umiarsuilli sikusiutit biilit assigaat. Motoorii akunngitsumik aallartinneqartassaaq, motooria suli atorsinnaanersoq qularnaarumallugu, orlogskaptajn Jan Bøcker Johansen Danbjørn-imi naalagaq oqarpoq.
Sikusiutit marluk januarimiit atorneqarnissaminnik nalunaarfigineqartalissapput.
Naalagaaffiup sikusiutai ukiut arlaqanngitsut qaangiuppata atorunnaarnissaat naatsorsuutigineqarpoq. Pisoqalisimapput, umiarsuillu nutaaliat ullumikkut namminneq sikusiorsinnaalersimapput.