Sila pillugu ataatsimeersuarnissami qanimut suleqtigiinneq
Avatangiisinut ministerip Connie Hedegaardip naatsorsuutigaa 2009-mi sila pillugu ataatsimeersuarnissami, Danmarkip ingerlatassaani, Kalaallit Nunaat piviusumik suliniuteqassasoq.
Tamanna takuneqarsinnaavoq folketingimi taartaasutut ilaasortamut Sofia Rossenimut akissutaani, taassuma avatangiisinut ministeri aperisimammagu ukiut marluk qaangiuppata FN-ip sila pillugu ataatsimeersuarnissaani qanoq isilluni qulakkeerusunneraa kalaallit politikerit oqartussaasullu piareersarnerni ingerlanneqarneranilu peqataatinneqarnissaat.
Connie Hedegaard akissummini oqarpoq sila pillugu naalakkersuisut pingaartitsinerat minnerunngitsumik pissuteqartoq issittumi, minnerunngitsumillu Kalaallit Nunaanni, silaannaap allanngornerata naatsorsuutigisamik kinguneqaatissai.
– Taamaattumik kalaallit naalakkersuisui Namminersornerullutillu Oqartussat kajumissaaginnarsinnaavakka Kalaallit Nunaanni eqqaanilu silap allanngorarneranik ilisimatusarnermik nakkutilliinermi peqataaqqullugit, Connie Hedegaard allappoq.
Avatangiisinut ministerip erseqqissarpaa Namminersonerullutik Oqartussanit aallartitat nunat tamalaat sila pillugu ataatsimiittarnerini qallunaat aallartitaannut peqataasassasut.
– Ataatsimiinnerni tamakkunani peqataaneq COP15-ip piareersarnerani aalajangiisuuvoq, taanna allappoq.