Silaannaap allanngoriartornerata ajortumeeriniarsinnaaneq annertusisippaa
Uuliamik gassimillu ujarlernerit ajortumeeriniartoqarsinnaanera annertusisippaa. Taamaattumik Natop generalsekretæria nunarsuarmiut siuttui kaammattorpai sunniuteqarluartussamik silaannaap allanngoriartornera pillugu isumaqatigiissuteqaqqullugit.
Piffissamik asuli atuinissamut piffissaqartoqanngilaq. Silaannaap allanngoriartornerata nassatarisai unitsinneqassappata, maannakkut iliuuseqartoqartariaqarpoq nunat 113-it naalagaat aamma naalakkersuisuisa siulittaasuisa Københavnimiinneranni. DR Byenimi silaannaap allanngoriartornera pillugu aamma nunarsuaq tamakkerlugu sillimaniarneq pillugu oqalittoqarnerani kaammattuuteqartoqarpoq.
Taamatut oqariartuuteqartut tassaapput danskit nunanut allanut ministeriat Per Stig Møller, svenskit nunanut allanut ministeriat, Carl Bildt, Natop generalsekretæria, Anders Fogh Rasmussen, nunat afrikamiittut kattuffiata siulitaasua Jean Ping (Den afrikanske Union, AU) aamma FN-ip ineriartortunut suleqatigiiffiani siulittaasoq Helen Clark.
– Piffissaq tassa maannakkuvoq. Maannakkut iluatsinngippat taava nunat siuttuisa aamma naalakkersuisuisa siulitaasuisa aappaagu tamanna iluatsinnavianngilaat, tassami maannakkut iluatsinngimmat, Per Stig Møller oqarpoq. Tikkuarpaalu nunarsuaq tamakkerlugu isumaqatigiissuteqarnissaq Dohami isumaqatigiinniarnermik taaneqartartumi uninngaannartoq.
Helen Clarkip isumaqataaffigaa maannakkut nunanit 113-iusunit naalagaaffiit aamma naalakkersuisuisa siulittaasui Københavniliarsimanngimmata angusaqanngitsuuinniarlutik.
– Siuttuunertik takutittariaqarpaat, maannartut tamarmik pisortatut maannarsimagunik, kilometerimik ataatsimik qaangeeqqinnissamut piginnaaneqarnertik takutittariaqarpaat, oqarpoq.
Anders Fogh Rasmussenip siuttuusut ilungersorluni kajumissaarpai ikummatissanik uuliamik aamarsuarnillu isumalluuteqarnitsinnik annikillisitsisussamik isumaqatigiissuteqaqqullugit.
– Ikummatissanik uuliamik aamarsuarnillu isumalluuteqarnerup annikillisikkiartuinnarneratigut Issittumi uuliamik gassimillu nassaarniarnissamik pisariaqartitsineq aamma annikilliartuinnassaaq, oqarpoq.
Carl Bildtip oqariartuutigaa: "Iluatsitsiniaritsi" kiisalu teknologimik nutaamik ilisimatusarnermik suliaqartunut suliffeqarfinnullu nassaarnissaq kaammattuutigalugu.
Aammattaaq Afrikamiit isumaqatigiissuqarnissaq ujartorneqarpoq. Naak nunavik tamanna CO2-p aniatinneqartut 3,8 procentiinnaa aniatikkaluarlugu taamaattoq kingunipiluanik sakkortuumik eqqorneqarput.
– Piareersimavugut, Jean Ping oqarpoq.