luftfart
Silaannakkut angalanneq Mittarfiliassanik sanaartorsinnaasut nassaarineqartut
Kalaallit Airportsip suliffeqarfiit katiterneri pingasut Nuummi, Ilulissani Qaqortumilu mittarfinnik pingasunik sanaartornermi akisussaalersinnaasut tamanut saqqummiuppai. Inaarutaasumik aaqqiineq juunip qaammataani saqqummiunneqassaaq.
Nunatsinni mittarfinnik pingasunik sanaartornissamut alloriarnerit siulliit ilaat manna pivoq.
Kalaallit Airports, pisortaq Steffen Ulrich-Lynge siuttoralugu Nuummi, Ilulissani Qaqortumilu pingasunik nutaanik mittarfiliornissamut akisussaasoq, suliffeqarfikkaanik pingasunik sanaartornissamut akisussaalersinnaasunik toqqaavoq.
Kalaallit Airports siunnersortissarsiortoq
Kalaallit, qallunaat Islandimiullu
Suliffeqarfikkaat pingasut assigiinngitsut katitikkat pineqarput:
Verkis hf., Reykjavik, Island. Verkis hf-ip saniatigut sanaartoqatigiit Isavia ohf Islandimeersunik, Multiconsult Norgimeersunit kiisalu S&M – Verkis nunatsinneersunit peqataaffigineqarput.
Rambøll Danmark A/S Rambøll Grønland A/S aamma Orbicon Arctic A/S, tamarmik nunatsinni kiisalu Orbicon A/S Danmarkimeersoq peqatigalugit.
COWI A/S Danmarkimeersoq Masanti A/S nunatsinneersoq peqatigalugu.
Kalaallit Airportsip inaarutaasumik aaqqiineq juunimi saqqummiutissallugu naatsorsuutigaa.
Ilulissani Nuummilu mittarfioreersut tallineqassapput, Qaqortumilu mittarfimmik nutaamik sanaartortoqassaaq.
Nuummi mittarfimmut akerliliisoq
Piffissami kingullermi Nuummi mittarfiup tallineqarnissaanut isumamut akerliliisoqarpoq. Illussanik titartaasartup Peter Barfoedip Nuummi imarpik ikaarlugu mittarfiup 2200 meterinut tallineqarnissaa siunissamut piareersimannginneranik isumaa, ataasinngormat quppernermi matumani atuarneqarsinnaavoq.
Kajumissaarut: Nuummi mitarfik tallinasiuk
Nittartakkakkut qupperneqalersut
Peqatigisaanillu Kalaallit Airportsip, Namminersorlutik Oqartussanit ulloq 1. juli 2016-imi pilersinneqartup, suliniutit pillugit innuttaasunik attaveqarnermik patajaallisarnissaanik kissaateqarnertik oqaluttuaraat.
Taamaammallu nittartakkakkut quppernermik, soqutiginnittut suliat qanoq siuariartornerannik malinaaffiginniffigisinnaasaannik pillersitsipput.