Silaannakkut angallannerit kaperlannerani amerlanerusinnaanerat misissorneqarpoq
Ukiuutillugu kaperlalluni taarnerusarnerani, silaannakkut angallassinerit amerlineqarsinnaaneranut periarfissat misissuiffigineqarput.
Kaperlannerani timmisartuussinernut malittarisassat, sillimaniarnerunissaq anguniarlugu, Danmarkimi Angallannermut, Sanaartornermu, Ineqarnermullu Aqutsisoqarfimmit 2017-imi sukateriffigineqarput.
Tamanna isumaqarpoq seqineqartinnagu qaammateqartinnagulu angallassisoqartassanngitsoq. Malittarisassat allanngornerat pissutigalugu Uummannap eqqaani qulimiguulimmik angallassisarneq annermik eqqorneqarpoq, angalasut arlallit Ilulissani Qaarsuniluunniit uniinnartariaqalertarmata.
Teknikkikkulli aaqqiissutissanik atorsinnaasunik nassaartoqassappat, kaperlannerani angallannerup annertusineqarsinnaanera, Angallannermut, Sanaartornermut Ineqarnermullu Aqutsisoqarfiup ammaappaa. Angallannermut ministeri Ole Birk Olesen (LA) Aaja Chemnitz Larsenip (IA) apeqquteqaataanut taama akissuteqarpoq.
Takusaqarsinnaalluni angalaneq
Akissummi allassimavoq Kalaallit Nunaanni angallanneq ulluunerani takusaqarsinnaanertut itsillugu ingerlanissaa malittarisassaniittoq, Air Greenlandili Bell-imik qulimiguulimmik timmisartuussinissamut immikkut akuerineqarsimasoq, sila qaamalaatillugu timmisartumi aquttoq malitassanik takusaqarsinnaappat.
Immikkulli akuersinerup annertusineqarsinnaanera ammaffigineqarpoq.
- Kalaallit Nunaanni kaperlannerup nalaani silaannakkut timmisartuussinerit sivitsornissaanut, timmisartuussisut Mittarfeqarfiillu siunnersuuteqarpata, Angallannermut, Sanaartornermut Ineqarnermullu Aqutsisoqarfiup misissuiffigissallugu periareersimavoq, akissummi allassimavoq.
Periarfissat qulaajarneqassapput
Tamannalu sulissutigineqartoq, aaqqeriaannanngitsorli Mittarfeqarfiit nalunaarput.
- Attaveqaatit atorluarnerulerumallugit Mittarfeqarfiit, timmisartuussisut aamma Ineqarnermut Attaveqaqatigiinnermullu Naalakkersuisoqarfiup akornanni suleqatigiittoqarpoq, Sermitsiaq.AG-p apeqqutaanut allakkatigut akissuteqarput.
- Qulimiguullit mittarfinnut missinnaanissaannut teknikkikkut pitsaanerusunik peqalissagutta, ataqatigiittariaqarput. Soorlu Mittarfeqarfiit atortunik aningaasaliissappat, atortut qulimiguulinnut tulluartuusariaqarput.
- Mittarfeqarfiit naalakkersuisoqarfillu siunissami periarfissanik misissuipput, timmisartuussisartullu tassani suleqatigineqarlutik.