Silaannakkut angallassineq anorersuarneranit akornguserneqartoq
Air Greenlandip marlunngornermi timmisartuussinissat arlallit pingasunngornermilu illoqarfinnit arlalinnit timmisartuussinissat tamaasa anorersuarnera pissutigalugu unitsiinnarsimavai.
Ukiaata anoraa kitaanut anngussimavoq, tamatumalu silaannakkut angallassinissat sunnersimavai.
Air Greenland nittartakkamigut ilisimatitsivoq, silaannakkut angallassinissat allanngorsinnaasut.
- Sakkortuumik anorlilertarnera pissutigalugu ullormi angallassinissamik pilersaarut ajoraluartumik akornguserneqarsimavoq. Ilaasussat timmisartumut allamut nuunniarlugit sulissutigaarput, Air Greenland nittartakkamigut Facebookikkullu allappoq.
Illoqarfiit maannakkorpiaq sunnerneqarsimasut tassaapput:
Nuuk
Kangerlussuaq
Ilulissat
Qaarsut
Uummannaq
Aasiaat
Upernavik
700-nit amerlanerusut sunnerneqarsimasut
Air Greenlandimit Sermitsiaq.AG-mut ilisimatitsissutigineqarpoq, ilaasussat 450-it missaanniittut ullumi taamaatitsiinnarnermit sunnerneqarsimasut, pingasunngornermilu ilaasussat 260-it sunnerneqarsimallutik.
- Air Greenlandi angallassinissamik nutaamik pilersaarusiorniariarpat, angalanissamut pilersaarutit nutartikkat nassiunneqassasut ilisimatitsissutigineqarpoq.
Nuummi sineriammilu sumiiffinni tamani maannakkorpiaq sekundimut 18 meterit missaannik anorlerpoq, sumiiffinnilu arlalinni sekundimut 25 meterit angusarlugit anoraasuasarluni, tamanna natsimaasariarluni anorersuannguuttartutut DMI-mit taaneqartarpoq.
Air Greenlandip ilaasussanut kaammattuutigaa, aallarfissat nutartikkat nittartakkakkut Facebookikkullu malinnaaffigeqqullugit.