Silap allanngoriartornera pillugu oqaaseqaat isumaqatigiissutaavoq
– Kisianni suli suliassaqaqagut, USA-p præsidentia tallimanngormat unnukkut Washingtonimut aallannginnermini taamatut oqaaseqarpoq.
Silap allanngoriartornera pillugu Københavnimi annertuumik isumaqatigiissuteqartoqanngilaq, nutaarsiassaqartitsiviit nalunaarput akunnattoornermi inerniliussatut taasariaqartoq.
Oqaaseqaat FN-ip silap allanngoriartornera pillugu Københavnimi ataatsimeersuartitsinerani nunat tamarmik peqataasut oqaaseqaat inatsisitigut pituttuinngitsoq isumaqatigiissutigigaat tusarliunneqarpoq.
USA-p præsidentia Obama, FN-imi ataatsimeersuartut tamarmik taasinnissaat sioqqullugu Københavnimit angerlarniarluni aalajangerpoq, naqissuserpaalu silap allanngoriartornera akiorniarlugu 'suli suliassaqartoqaqisoq'.
- Suli sulissaqaqagut, præsidenti oqarpoq ilanngullugulu, nunat pisuut kiisalu piitsut akornanni tatigeqatigiinnermik annertunerusumik pilersitsisoqartariaqartoq, inatsisitigut pituttuisumik isumaqatigiissuteqartoqarnissaa isumaqatigiissutineqassappat.
Ritzau tunngavigalugu oqaaseqaammi erserpoq USA imminut pisussaatissimasoq 3,6 milliard dollarinik (18,7 milliard koruuningajaat), nunanut piitsunut piffissami 2010-miit 2012-imut, tapiissuteqarniarluni silaannaap allanngoriartorneranut akiuiniarnermut atugassanik.
Frankrigip præsidentia, Nicolas Sarkozy, oqarpoq nunarsuarmi inuiaqatigiit tamakkerlutik oqaaseqaat tapersersoraat, kisianni annikillisitsinissanik tigussaasunik ilaqanngitsoq.
Nalunaarutigineqartut ilaagaat Sarkozy aammattaaq oqarsimasoq, Tyskland qaammatit arfinillit qaangiuppata silap allanngoriartornera pillugu ataatsimiititiniartoq. Tamatumani inatsisitigut pituttuisumik isumaqatigiinniarnerit ingerlanneqassapput.