Silap pissusaata ajornartoortitsinera: Aalisartut piniartullu 300-it sinnerlugit amerlassusillit qinnuteqarput

Aningaasaliunneqartut 1 million koruunit piumaneqarluarput, taakku aningaasaliussat aalisartunut piniartunullu silap pissusaata allanngornerata kingunerisaanik ikiorsiissutissatut illuartinneqaqqaarallarnikuugamik. Qinnuteqartulli utaqqisinnaassuseqalaartariaqarpasipput qinnuteqaatertik akuerineqarsimanersoq paasissallugu oqartussammi arlariit aqqusaaqqaarlugit akissutissat piariissammata.

Pissutsit nalinginnaasut atuukkaluarpata immami sikusimasumi piniartut qimussimik inuussutissarsiutertik ingerlassinnaassagaluarpaat. Immalli sikuata takkutinngitsoornerata kingunerisaanik aammalu kaperlannerata kingunerisaanik Avannaani piniartut inuussutissarsiumminnik ingerlatsisinnaajunnaaqqapput. Tamanna pillugu immikkut ittumik ikiorsiissuteqalernikuuvoq.

Asseq toqqorsivimmit / Arkivfoto - Leiff Josefsen

Jensine Berthelsen

sisamanng 28. dec 2023 08:59

Annonse

Aalisarnermut piniarnermullu naalakkersuisoqarfimmi ulapputtoqarpoq qinnuteqaateqartorpassuit sukkasuumik sullinnissaat qulakkeerniarlugu, tassa aalisartut piniartullu silap pissusaata allanngornerata kingunerisaanik inuussutissarsiumminnik ingerlatsinaveeqqasut ikiorneqarnissamut periarfissaq atorluarpaat.

- Silap pissusiata allanngornerata kingunerisaanik patsiseqartumik ajunaarnersuartut pisoqartillugu isertitaqarsinnaanngikkallarnermi ikiuinasuarnissamut qinnuteqartut maannakkut 300-t sinneqartut tiguneqarsimalerput, taakkulu suli amerliartorput. Ikiuinissamut malittarisassat malillugit qinnuteqaatit tamarmik nalilersorneqarlutik suliarineqartussaapput. Tamannalu maannakkut ingerlavoq, naalakkersuisoqarfik erseqqissaavoq.

Ikiuinissamulli tunniussisoqassappat, Aningaasanut 2024-mut inatsimmi oqaasertaliunneqarsimasut malinneqassapput, ima allassimasoqarluni:

“Aningaasaliissutit iluanni Naalakkersuisut Aningaasaqarnermut Akileraartarnermullu Ataatsimiititaliap akuersissuteqarneratigut aalisartunut, piniartunut nunalerisunullu aningaasaqarnikkut ikorfartuinissaannut piginnaatinneqarput, matumani inuussutissarsiornermi isertitaat silap pissusiata allanngornerata kingunerisaanik piffissap sivikitsup iluani tamarmik annertuumilluunniit appariarsimappata.“

Aningaasaqarnermut ataatsimiititaliap qinnuteqaatit akuereqqaassavai

Qinnuteqaaterpassuit taakku inatsisit malillugit suliarineqartussaapput, maannalu tassa naalakkersuisoqarfimmi ulapittoqarpoq qinnuteqaatit naammassilerasuarnissaat qulakkeerniarlugu.

Taamaalilluni Naalakkersuisut pisinnaatinneqarput, Aningaasaqarnermut Akileraartarnermullu Ataatsimiititaliap akuersineratigut ikiorsiissutinik tunniussisinnaanermik.

Aamma isummernissamut tunngavissiami inassutigineqartoq Naalakkersuisunit akuerineqarluni, Inatsisartut Aningaasaqarnermut Akileraartarnermullu Ataatsimiititaliaannut ingerlatinneqassaaq, tassanilu akuerineqarpata, ikiorsiissutinik aatsaat qinnuteqartunut tunniussisoqarsinnaassaaq.

Naalakkersuisoqarfiup qinnuteqaatit suliarileruttorpai, Naalakkersuisunulli aalajangernissamut tunngavissiaq suliarineqaqqaartoq naalakkersuisoqarfimmit ilisimatitsissutigineqarpoq.