Silap pissusaata allanngornerata kingunerisaanik Naalakkersuisut inuussutissarsiutinut ikiorsiisalernissaq aqqutissiuuppaat
Naalakkersuisut neriorsuipput aalisartunut, piniartunut nunalerinermillu inuussutissarsiuteqartunut ikiorsiisinnaaneq ammaanneqassasoq inatsisit pioreersut nalimmassarneqarnerisigut.
Silap pissusaata naatsorsoruminaallinera tunngavigalugu nunarsuarmioqatigiit assigiinngitsutigut ajornartorsiuteqalernikuupput. Inuussutissarsiutimmi ilaat silap pissusaata allanngorneranut misikkarissorujussuupput.
Maani Kalaallit Nunatsinni pingaartumik ilitsoqqussaralugu inuussutissarsiutit aammalu nunatta aningaasarsiorneranut kivitseqataasut, aalisarneq, piniarneq nunalerinerlu silap pissusaata allanngorneranut misikkarissutut inissisimapput.
Naalakkersuisunngornissami tungaanut Inatsisartuni ilaasortaasimasoq, Agathe Fontain (IA) siunnersuuteqarnikuuvoq innuttaasunut, aalisartut, piniartut savaatillillu inuussutissarsiorlutik ingerlatsinerminni silap allanngoriartorneranut attuumassutilimmik ajunaarnersuarmut assingusumik eqqugaasut aningaasatigut ikiorserneqarnissaat siunertaralugu Naalakkersuisut Aningaasanut Inatsimmi kontumik nutaamik pilersitseqqullugit Naalakkersuisut peqquneqarnissaannik Inatsisartut aalajangiissasut.
Agathe Naalakkersuisunngornikuummat Inatsisartuni ilaasortap Pipalyk Lynge-p siunnersuut kingornunnikuuaa.
Maanna siunnersuuteqartup siunertaa naaperiarlugu aaqqiissutissamik pilersaarusiortoqalerpoq, tassalu inuussutissarsiutinik ingerlataqartut, aalisartut, piniartut nunalerinermillu inuussutissarsiuteqartut silap pissusaanik eqqornerlugaasimasut ikiorneqarsinnaanissaannut periarfissarsiuussisoqarmat.
Konto nutaaq pilersinneqassanngilaq - periarfissarli ammaanneqassaaq
Siunnersuuteqartoq kissaateqaraluarpoq aningaasanut inatsimmi kontomik pilersitsisoqassasoq, tamannali pissanngitsoq Inatsisartuni amerlanerussuteqartut aalajangerput, tassami inatsisit pioreersut naleqqussarneqarnerisigut silap pissusaata allanngorneranik pissuteqartumik ajunaarnersuartut ittumik eqqugaasimasut ikiorneqarsinnaalissasut siunnerfigineqarmat.
Aalisartut piniartullu ullumikkut inuussutissarsiumminnik ingerlatsisinnaassagunik inuussutissarsiummut sillimmasiinissamik pisussaaffeqarput, tamannali nunalerinermik inuussutissarsiuteqartunut atuutinngilaq, nunalerinermillu inuussutissarsiuteqartut ikiorsiisinnaanermut ilaassappata, taava aamma sillimmasertussaatitaaneq taakkununnga atuutsinneqalissasoq siunniunneqarpoq.
Inatsit nutartigaq 2024-mi ukiakkut ataatsimiinnermi saqqummiunneqassaaq
Agathe Fontain-ip siunnersuuteqqaavata suliarineqarnera kingaattooqqammat, ikiorsiisoqarsinnaalernissamik sulissutiginninneq ilanngulluni kinguaattooruteqassaaq, tassa inatsisitigut naleqqussaaneq atuutsitsilernermik inerneqartussaq eqqarsaatigalugu. taamaammat aatsaat ukiaq manna aappassaaneerneqartoq tunngavigalugu sulineq ingerlaqqissinnaammat:
- Inuussutissarsiutigalugu aalisartut, inuussutissarsiutigalugu piniartut inuussutissarsiutigalugulu nunalerinermik ingerlataqartut aallarteqqinnissamut tapiiffigineqartarnerat pillugu Inatsisartut inatsisaat nutarterlugu allannguutissatut siunnersuutip upernaakkut ataatsimiinnermi 2024-mut taarsiullugu ukiakkut ataatsimiinnermi 2024-mi Inatsisartunut saqqummiunneqarnissaa naatsorsuutigineqartoq, Naalakkersuisut oqaatigissavaat. Tassunga pissutaavoq siunnersuutaaqqaartup suliarineqarnera kinguaattoornikuummat.