Silap pissusia pillugu ilisimatusarneq: Issittoq ima sunnerneqarpoq
Silap pissusia pillugu ilisimatusarnerup nutaap silaannaq uumassusillillu allanngoriartornerat ataatsimoortippai, taamaalillunilu Issittumi silap pissusiata annertuumik allannguutaanik ilisimatuut takutitsipput
Ilisimatusarnerup Environmental Research Lettersimi saqqummersinneqartup, piffissami 1971-mit 2017-imut misissuinermit paasisarpassuit ataatsimoortippai. Issittumilu pingaarutilinni qulingiluani tunngaviusumik allanngortitsisut, taakku takutitsipput; silaannaap kissatsikkiartornera, qeriuaannartoq, hydroklimatologi, aput, siku, sermeq, qaqqami ikuallannerit, qeriuaannartup masarsua aamma pinngortitap ataqatigiinnera aamma kulstoffip kaaviiaarnera, allaaserisami GEUS-ip saqqummersitaani tamanna atuarneqarsinnaavoq.
Ilisimatusarnermi allaaserinnittut silaannaap kissassusiata aamma biofysiskip akornanni naapertuuttoqarneranik nassaarput – soorlu qeriuaannartup masarsuanik pilersitsineq. Aammattaa biofysiskinik akornusersuinernik amerlasuunik takusaqarput – assersuutigalugu qaqqami ikuallattut amerleriarsimapput, naasut sikkertarnerisa aamma sullernit pujoralatserisut piffissaat akunnattoorfiunerat, aamma naasut sullinernit saassunneqarnissaminnut ajortianerulersimanerat, tamanna atuarneqarsinnaavoq.
Allannguutit annertuut
- Silap pissusiani takussutissarpassuit misisukkagut kisitsisitigut silaannaap kissasusaanut imaluunniit nittaallanut sialunnullu ataqatigiinnermik takutitsipput. Silaannaap kissatsikkiartornera aamma nittaallap sialuullu annertusinera issittumi annertuumik allannguuteqartitsinerinut eqqarsarnermut sakkortusaataapput, Jason Box, GEUS-imi ilisimatusarnermi professori aamma ilisimatusarnerup nutaap allaaserinnittuini pingaarnerit ilaat taama oqarpoq.
Jason Boxip oqarnera naaperrtorlugu, issittumi periuseq 1900-kkunnit allaanerulissasoq maanna qularnarunnaarpoq – tamannalu Issittoq qaangerlugu taamaannissaa takussutissaqartoq.
- Issittumi silaannaq nunarsuup sinneranit sukkanerusumik kissakkiartorami, Europami, Amerika avannarlermi Asiamilu silap periusai ilungersunarneruleriartussapput, tamannalu silap pissusiata ingasannerulerneranik kinguneqassaaq. Tamatuma saniatigut anorit ingerlaarnerini akornusersuinernik takusaqarpugut, tamannalu silap pissusianik allanngorarnerulersitsisinnaavoq – assersuutigalugu Europap avannaani nillernerulerluni aamma anorersuit sakkortunerulerlutik, Jason Box oqarpoq.
Videot aamma assiliartalersuinerit takukkit