Silap pissusianik ilisimatuut Nuummut
Silap pissusianik ilisimatusarnermi Kalaallit Nunaat aatsaat iluamik saqqumilaalersinneqassaaq "Nuuk Climate Days" aggustimi ingerlanneqalerpat.
"Nuuk Climate Days" ilisimatuut silap pissusia pillugu Kalaallit Nunaanni ataatsimiinnerisa siullersarissavaa. Ataatsimiinneq Kalaallit Nunaannik silallu pissusianik ilisimatusarnermut centerimik samminnitsitsilissaaq.
– Nunarsuarmi silap pissusianik ilisimatuut pikkorinnerpaat Kalaallit Nunaaliassapput. Nalinginnaasumimmi allani sumiiffinni tamani ataatsimiittaraluarput, professor Søren Rysgaard, Pinngortitaleriffimmi silap pissusianik ilisimatusarnermut centerimi pisortaq, oqaluttuarpoq.
Søren Rysgaardip pingaartumik nuannaarutigaa "Nuuk Climate Days"-ip amerikarmiunit sammineqarnerujussua. Ataatsimiinnermi ilaatigut peqataassaaq amierkarmiut ilisimatusarnermut aningaasaliissuteqartarfiat National Science Foundation.
– Neriuutigaarput tamanna immikkut ilisimatusarnerpassuarnik kinguneqassasoq, immikkut aningaasaliissuteqartoqarluni aammalu kalaallit-qallunaat-nunat tamalaat suleqatigiinnerannik kinguneqartumik, Søren Rysgaard sermitsiaq.gl-imut oqarpoq.
Tamanna peqatigalugu ataatsimiinneq periarfissaalluassaaq silap pissusianik ilisimatusarnermut centerip nutaap ilisimatuunut nunanit tamalaaneersunut ilisaritinnissaanut. Neriuutigineqarpoq ilisimatuut nunanit tamalaaneersut Kalaallit Nunaat isiginialissagaat sermersuullu aakkiartorneranut pissutaasunik tamatumalu kinguneqaataanik sammillutik.
– Silap pissusianut centerip inuiaqatigiit akuutilersissavai. Qimerloorlugu kalaallit inuiaqatigiit qanoq isillutik nunami silap pissusiata allanngoriartorneranut naleqqussassanersut, Søren Rysgaard oqarpoq.
"Nuuk Climate Days" Katuami ingerlanneqassaaq ulluni aggustip 25-anniit 27-annut. Ataatsimiinnermik suleqatigiillutik aaqqissuusisuupput DTU, DMI aamma Pinngortitaleriffimmi silap pissusianik ilisimatusarnermut centeri.