Silap pissusianut ambassadørit ulapipput
Kalaallit Nunaata silap pissusianut ambassadørii pingasut ulluni makkunani sinippiarneq ajorput.
Ullaakkut nalunaaqutaq 8.00 aallartittarput qaqutiguinnarlu nalunaaqutaq 21.00 sioqqullugu naammassisarput, silap pissusianut ambassadørit nunarsuarmit tamarmeersut oqaloqatigalugit.
- Nunarsuarmi sumi tamaani silap pissusiata allanngoriartornera pillugu paasisaqartartorujussuuvugut. Allallu paaserusuttorujussuuvaat uagutsinni silap pissusiata allanngoriartornera, Kalaallit Nunaata silap pissusia pillugu ambassadøriisa pingasut ilaat, Ivalu B. Christensen Aasianneersoq, tusagassiorfinnut nalunaarummi paasissutissiivoq.
- Aamma annertuumik ilinniarparput ilisimasavut qanoq isilluta Kalaallit Nunaanni tamarmi meeqqanut inuusuttunullu allanut ingerlateqqissinnaanerivut. Tamannalu peqatigalugu ulapputigaarput Europami, Afrikami Asiamilu ambassadørinut attavinnik pilersitsinissaq, taanna erseqqissaavoq.
Sunniiniarneq
Attaveqarfiit atorneqassapput ataatsimoorluni inersimasunik killiiniarnissamut silap pissusiata allanngoriartornera akiorniarlugu kingusinaartinnagu iliuuseqarnissaanik.
Ivalu B. Christensenip nammineq meeqqat attaveqarfigisimavai nunanit assigiinngitsuneersut, soorlu Kinamit, Koreamit, Hong Kongimit, Zambiamit, Maldiverne-mit, Tajikistanimit Tysklandimillu.
Meeqqat Silap Pissusia Pillugu Ataatsimeersuarneranni peqataasut tallimanngormat inassuteqaatitik FN-ip silap pissusia pillugu ataatsimeersuartitsinerani ministerianut Connie Hedegaardimut tunniutissavaat, taakkulu silap pissusia pillugu ataatsimeersuarnermi COP15-imi sulinermi peqataatinneqassapput.