Silap pissusiata allanngoriartornera ulluinnarni malugineqarsinnaavoq
Kalaallit quliugaangata, arfineq-pingasut, silap pissusiata allanngoriartornera ulluinnarmi malugisinnaavaat. Misissuinerup nutaap tamanna takutippaa.
Kalaallit Nunaanni innuttaasut 79 procentii akissutiminni silap pissusiata allanngoriartornerata kinguneri namminneerlutik malugisinnaavaat.
Københavnimi Universitetip Ilisimatusarfik suleqatigalugu, Greenland Perspectivemik misissuisitsinerata tamanna takutippaa.
Misissuinermi innuttaasut 606-it, illoqarfinniit nunaqarfinniillu, nunatsinni kommuninit tamarmiusuniit apersorneqarsimapput.
Aalisagaqarnerulerpoq
Silap pissusiata allanngoriartornera Uummannap eqqaaniittumi nunaqarfimmi Saattuni, iluaqutaasutut malugisinnaavaat. Sermersuaq ilummukariartorpoq, aalisarnerlu allatut ilersimalluni.
- Uagutsinnut ajortumik kinguneqarnikuunngilaq. Saarulleqalernerulerpoq, ukiuugaluaraangalluunniit ningitsigaangatta saarullinnik pisaqartarpugut, Apollo Mathiassen, Saattuni najugaqartoq oqarpoq.
Dorthe Dahl Jensen, Niels Bohr Instituttimi, Center for Is og Klimami pisortaq, allannguutit Apollo Mathiassenip oqaluttuarisaata tunuliaqutai nassuiarsinnaavai.
- Sermersuit aakkaangata sermersuarmiit imeq annertooq immamut pisarpoq. Nunaminertat inuussutissaqarluartut ilanngullutik nakkaqataasarput. Avatangiisit uumassusininnerusarput, aalisagaqarnerulersinnaallutillu, Dorthe Dahl Jensen oqarpoq.
Siku saalisimavoq
Apollo Mathiassenimut iluarluinnarpoq piffissami sivisunermi aalisarsinnaaneq. Piniartunulli, sikusiorlutik puisinik uuttunniartartunut allanngortoqarnera ajornartorsiuteqartitsivoq.
- Siku aattujaarnerusalerpoq, saannerusalerlunilu. Siornatigut 1 miiterisut issutigilersinnaasaraluarpoq, maannakkut 50-70 centimiiterit missaannaaniittalerpoq, Apollo Mathiassen oqarpoq.
Taanna nassuiaavoq sumiiffinni allani silap allanngoriartornerata kingunerisaanik, sikullu allaanerusalernerata kingunerisaanik ajornartorsiortoqartartoq.
Avannaata Kommuniani (83 procent) aamma Qeqertalik Kommunemi (85 procent) innuttaasut amerlanerit silap pissusiata allanngoriartorneranik malussarnerupput. Kommuneqafik Sermersuup kitaaniittut (69 procent) silap pissusiata allanngoriartorneranik malussarnikinnerupput.