Silarluk ilisinissamik akornusiivoq
Ilaqutaasut ilaat ungasissumit Nutaarmiuliaapput, aanamik 75-inik ukiulimmik, panianik 31-nik ukiulimmik ernuttalimillu arfineq-pingasut ukiulimmik ilisiartorlutik
Nutaarmiuni sapaatip akunnerata siuliani toqutaasut ippassaq Upernavimmit Nutaarmiunut timmisartuunneqartussaagaluarput, piffimmili silarlunnera ippassaq timmisartuussinissanik kinguaattoortitsivoq.
Maannamut pilersaarutit naapertorlugit timit toqungasut ullumi nunaqarfimmut timmisartuunneqarnissaat.
Tasiusamut Nutaarmiunullu ajoqi Thomas Svendsen ilisinermik ingerlatsissaaq, ilimagineqarpoq aqagu ilisinissaq ingerlanneqarsinnaassasoq.
Nunaqarfiup oqaluffiat inuit akornanni Kalaallit Nunaata oqaluffiisa mikinerpaartaatut taagorneqartoq inunnut 30-iinnarnut inissaqarmat illoqarfiup atuarfiani naalagiaqatigiinneq ingerlanneqassaaq, tassani inissaqarnerummat.
Ilaqutaasut aalajangiuppaat ilisinissaq ilaqutariit ittortaannit 81-init ukiulimmit peqataaffigineqarnani ingerlanneqassasoq, taanna Rigshospitalimut ingerlanneqartariaqaramili suli sinittitaammat. Paasisat kingulliit naapertorlugit ajunngilaq, naak pinerlineqarnermigut niaquata saarngi ajoqquserneqarsimagaluartut.
Angut 32-nik ukiulik ullumi aqaguluunniit Dronning Ingridip Napparsimavissuanut ingerlanneqassaaq nakkutigineqarallarnissaa pissutigalugu.