Sillimaniarneq: Nunatsinnit aallartitaq nunanut allanut ministereqarfimmik sullississasoq
Lida Skifte Lennert Danmarkip Bruxellesimi NATO-mi aalajangersimasumik sinniisoqarfiani ambassaderåditut atorfimmini nutaami aallarteqqammerpoq. Ilisimatusartulli maluginiarpaa, Nuummi nunanut allanut naalakkersuisoqarfimmik sullissinani Danmarkimi nunanut allanut ministereqarfimmik sullississasoq.
Naalakkersuisut nunanullu allanut ministereqarfik upernaaq kalaallimik aallartitamik nuimasumik Danmarkimi Bruxellesimi NATO-mi aalajangersimasumik sinniisoqarfiani aallartitaqalernissamik.
Taamak allaaserinnippoq aviisi Sermitsiaq.
Tusagassiuutitigut nalunaarummi Naalakkersuisuneersumi Nunanut allanut Tunngasuni, Inuussutissarsiornermut Niuernermullu Naalakkersuisoq Vivian Motzfeldt (Siumut) ilaatigut allappoq ”Avannaarsuani isumannaallisaanermut politikkimut, kiisalu NATO-p nunarsuup ilaanut tamaanga isiginninneranut Kalaallit Nunaata ilisimasaqarnerulernissaa pingaaruteqarpoq”.
Lida Skifte Lennert Naalakkersuisut naapertorlugit nunanut allanut ministereqarfimmit aallartitat sinneri peqatigalugit sinniisoqarfimmut ilaalissaaq Kunngeqarfimmilu sillimaniarnikkut pingaarnersiukkanik siuarsaanissamik suliaqarnermut atatillugu Issittumi pissutsit pillugit ilisimasaminik avitseqatiginnittassalluni.
Namminersorlutik Oqartussanit atukkiunneqartoq
LinkedIn-imi qanittukkut allagarsiussami Lida Skifte Lennert allappoq: ”Ambassaderåditut atorfimmi nutaami, Namminersorlutik Oqartussanit DANATO-mut atukkiunneqarlunga, aallartinnera avitseqatiginnissutigisinnaagakku nuannaarutigaara”. Oqaasertaliussarlu ”Namminersorlutik Oqartussanit atukkiunneqarlunga” ersersitsivoq atorfik Kalaallit Nunaannit sinniisutut allatut ittuunngitsoq. Taama Dansk Institut for Internationale Studierimi (DIIS) ilisimatusartoq, Ulrik Pram Gad, nassuiaavoq.
– Atukkiunneqartoq isumaqarpoq, Namminersorlutik Oqartussanit aningaasarsiaqartinneqartoq, Danmarkip nunanut allanut ministereqarfia sullikkaluarlugu. Qullersaqarnermut tunngasut maluginiagassaqqissuupput. Naalakkersuisut tungaannit isumaaqqaarsimagaluarpoq Nuummut ingerlatitseqqiisassasoq, tamannali allatut inerneqarsimavoq. Tamanna pissuteqarunarpoq, nunanut allanut sillimaniarnermullu politikkip oqartussaaffigineqalersimanngitsup pineqarneranik, taamaattumillu nunanut allanut ministereqarfik tamatuminnga kimigiisissuteqarsimalluni.
Allaaserisaq tamaat aviisimi Sermitsiami atuaruk:
