Sinerissami radarit marluk Kalaallit Nunaata imartaani nakkutilliinermik pitsanngorsaassapput
Danmarkimi naalakkersuisut Kalaallit Nunaata imartaani nunami AIS-imik ikkussuinissamik pilersaaruteqanngillat. Sinerissamili radarinik marlunnik ikkussuineq suli suliarineqarpoq, sumili ikkussuinissaq suli isumaqatigiissutigineqanngilaq, ministeriaqarfik ilisimatitsivoq.
Ukiut 18-it matuma siorna Danmarkimi AIS-imik, umiarsuarnik imminnut ilisarisinnaalernersitsisunik, atortorissaarutiliortoqarpoq.
Umiarsuit immikkut atertik, ingerlavitsik sukkassusertillu pillugit paasissutissat ingerlaannaq atortorissaarummut nassiuttarpai, folketingimullu ilaasortap Aaja Chemnitzip (IA) danskit naalakkersuisui aperai imaatigut isumannaatsuunissaq eqqarsaatigalugu Kalaallit Nunaanni aamma taamaaliortoqarnissaa pilersaarutigineqarnersoq.
Inuussutissarsiornermut ministeri Morten Bødskov ilisimatitsivoq taamaaliornissaq pilersaarutaanngitsoq. EU-p piumasaqaatai tunngavigalugit danskit imartaanni atortussaq atulersinneqarsimavoq, ilisimaneqartutuullu Kalaallit Nunaat EU-mut ilaasortaanngilaq, taamaattumillu piumasaatit taakkut atuutilersinneqarsinnaanatik, inuussutissarsiornermut ministeri Aaja Chemnitzimut allakkatigut akissuteqarluni oqarpoq.
Sinerissami radarit nakkutilliisut
Kalaallit Nunaatali imartaani nakkutilliinerup pitsaanerulersinnissaa pillugu ministerip illersornissamut ministeriaqarfik aperisimavaa, Kalaallit Nunaannilu sinerissami radarinik marlunnik pilersitsinissaq sulissutigineqartoq akissutigaat.
Radarit aamma angallannermi isumannaallisaanermut iluaqutaassapput, sumili inissinneqarnissaannik suli aalajangiisoqanngilaq:
”Issittumi piginnaasanik annertusaanissamut atatillugu Illersornissamut ministereqarfiup ataani Kalaallit Nunaanni sinerissami radarinik marlunnik pilersitsisoqassaaq. Illersornissaqarfiup Kalaallit Nunaanni sulineranik sinerissami radarit nukittorsaataassapput, aamma imaatigut angallannermi isumannaatsuunermut tamanut iluaqutaassapput. Sumi inissinneqarnissaat suli aalajangerneqanngilaq,” Illersornissamut ministereqarfik akivoq.
Issittumi piginnaasanik annertusaanissaq Folketingimi amerlanerussuteqartut 2021-mi februaarimi isumaqatigiissutigaat. Isumaqatigiissummi Kalaallit Nunaanni sinerissami radareqarfissat 20 millionit koruuninik aningaasartaqartussaapput, ukiullu pingasut ingerlareersullu sumi inissisimanissaat suli aalajangerneqanngilaq.
Aaja: AIS-ip tamakkiisumik atulernissaa eqqarsaatigineqartariaqarpoq
AIS-ip Kalaallit Nunaata imartaani tamakkiisumik atulernissaa Danmarkimi naalakkersuisut eqqarsaatigisariaqaat Aaja Chemnitz isumaqarluni Sermitsiaq.AG-mut oqarpoq:
- Paasisakka naapertorlugit Kalaallit Nunaat siammasissumuinnaq kisimi nakkutigineqarpoq, tamannalu isumannaallisaanermut tunngassuteqarpoq – nakkutilliinermut aammali umiartornerup isumannaatsuuneranut tunngatillugu, oqarpoq nangillunilu:
- Sinerissami radarit atornissaat pitsaasuuvoq, Kalaallit Nunaatali eqqaani qanoq pisoqarnersoq tamakkiisumik takuneqarsinnaasariaqarpoq.
- Assersuutigalugu Kinamit sakkutuut umiarsuaat Ruslandillu aqqartartui tamaaniippat, politikeri aperivoq.