Sinniisussat piareersimapput
Nutaaneq: Tallimanngorpat Naalakkersuisut nutaat ivertinneqareerpata taava sinniisussat arfinillit Inatsisartunut isissapput.
Inuit Ataqatigiinnit paarlaasussat pingasut, Demokraatiniit marluk kiisalu Kattusseqatigiit Partiiannit ataaseq naalakkersuisunut ilaasortanngortut, Inatsisartuniit nalakkersuisunngornertik pissutigalugu suliffeqarusuttut issiaviannut ingissapput.
Sinniisussat tassapput qinigassanngortittut Inatsisartunut qinigaanngitsoortut kiisalu sinniisussat allattorsimaffianni siullit tallimat akornanni inissisimasut.
IA-p partiiata allaffianiit ilisimatitsissutigineqarpoq Agathe Fontain (peqqinnissaq), Ane Hansen (piniarneq aalisarnerlu) aamma Maliina Abelsen (ilaqutariit) Inatsisartuniit sulinngiffeqarnissaminnik qinnuteqarniarput, aallaqqaataani taamatut pissanngillat Kuupik Kleist (nalakkersuisut siulittaasuat) aamma Mimi Karlsen (kultutereqarneq aamma ilinniartitaaneq).
- Tamatumunnga pissutaavoq inatsisartunut ilaasortaatitatta affangajaasa ataatsikkut taarsernissaat kissaatiginnginnatsigu, kisianni tamanna marlunnik immikkoortulerlugu ingerlanniaratsigu, Mimi Karlsen oqarpoq, taamaattorlu oqaatigisinnaanngilaa qaqugu nammineq aamma Kuupik Kleist inatsisartuni issiavitik qaqugu allanut tunniutissanerlugit.
IA-mi sinniisussat siuliit pingasut tassaapput Debora Kleist (taasinerit 102), Anders Olsen (taasinerit 88) aamma Jane Petersen (taasinerit 87), taakkulu tallimanngorpat Inatsisartunut ilaasortanngussapput Naalakkersuisut nutaat qinerneqareerpata.
Demokraatini Jens B. Frederiksen (ineqarneq, attaveqarneq aamma angallanneq) kiisalu Palle Christiansen (aningaasaqarneq) tamarmik Inatsisartunit sulinngiffeqarniarput taakkulu paarlaasussaat tassaapput Anda Uldum (taasinerit 79) aamma Justus Hansen (taasinerit 77), taamatuttaarlu Mogens Kleistip (taasinerit 61) Inatsisartunut uteqqinnissani nuannaarutigisinnaavaa, partiimi siulittaasortik Anthon Frederiksen nunami namminermut, avatangiisinut aamma pinngortitamut naalakkersuisunngorpat.