Siumumi aaqqiagiinnginneq
SIS: Ikerinnakkut qinersineq isumatusaarnerussanngilaq
Siumup inuusuttunut immikkoortoqarfiani SIS-mi ilaasortaq Ineqi Kielsen isumaqarpoq ikerinnakkut qinersisoqassappat aalajangigassat pingaarutillit kinguartiterneqaannarumaartut
Innuttaasut naalakkersuisunik naammaginnigatik qinerseqqusitut Siumup inuusuttunut immikkoortoqarfiani SIS-mi iilaasortamit Ineqi Kielsenimit ilalerneqanngilaq. Taanna isumaqarpoq kingullermik inatsisartunut qinersinerup inernera ataqqineqartariaqartoq taamanikkut Siumut Nunatsinni partiini anginersanngoqqimmat.
Atuaruk: Qinersinissaq qinersisartut piumasaraat
Ikerinnakkut qinersinissamik piumasaqartut atsiornernik katersipput. Giiti Tittusen Nuummeersoq aallartitsisuuvoq maannalu 1.100-ut sinnillit atsioreerput. Taanna uani takusinnaavat.
Taamatulli piumasaqarneq Ineqi Kielsenimit SIS-meersumit aamma Siumup siulersuisuunerini ilaasortaasumit ilalerneqanngilaq.
- Soorunami ataqqisariaqarpavut taama isummersortut, inuiaqatigiinnimi taamatut isummersorsinnaanerit inissaqartuaannarmata aammalu inissaqartuaannassallutik.
Eqqissillutik sulilik
Kisiannili apeqquserusuppara ilumut eqqarsaatigilluakkamik taamatut saqqummernersut, tassami malunnarmat tunngavilersuutigineqartut qinerseqqinnissamik suaaruteqarnissamut ikkappallaartut, Ineqi Kielsen tusagassiutinut nalunaarummini allappoq.
Taanna isumaqarpoq Naalakkersuisut Siumumit siuttuuffigineqartut eqqissillutik sulisinnaasariaqartut.
- Siuttussatsinnik qinersisimavugut. - Siumumullu pisussaaffinngorsimavoq isumatusaartumik aammalu pingaarutilinnik aalajangiisarnissaq. Inuiaat nammineersut nikussaartariaqalerput, namminiilivinnissaq qimoqatigiinngikkutta ajattortuassavarput, Ineqi Kielsen oqarpoq.
Taassuma qinerseqqusitut aperai qinerseqqinnermi Siumut ajugaassagaluarpat aamma qinerseqqinnissamik piumasaqarniarnersut tamannalu uteqttaarlugu Siumup ikinnerussuteqalernissaa tikitserlugu.
Ineqi Kielsen aamma isumaqarpoq namminiilivinnissaq ungavartinneqaannassasoq inuiaqatigiinni avissaartuunneq pissutigalugu.