Sisimiuni upalungaarsimasut pisortaat: Gassi illup iluani atornissaa navianarpoq
Ataataasip angerlaesimaffiup ilua nillertoq kialaartinniarlugu grillerivik gassitortoq atortariaqarsimavaa. Tamannalu navianartuusoq upalungaarsimasut pisortaata mianersoqqussutigaa.
Ataataasup inigisartik sapaatip akunningajaa nillertuinnaammat grillerivik atorlugu kiassartariaqarsimavoq. Taamaaliornissarli navianartuusoq Qeqqata Kommunianiani upalungaarsimanermut pisortap, Inunnguaq Lundbladip mianersoqqussutigaa:
- Gassit silamut nalunginnaasumik atugassaanianerusarput. Illup iluani atugassiaangitsut ulorianarsinnaapput. Assersuutigalugu gassimik illup iluanut aniasoortoqassagaluarpat inip ilua gassimik immerujooriarluni qaartoornermik ikuallattoornermillu kinguneqarsinnaavoq.
Kiassaatit supoortut atorneqarsinnaapput
Upalungaarsimasut pisortaata paasisinnaanerarpaa ataataasup ilaquttani kissassimaartinniarlugut grillerivik illup iluani kiassaatigisariaqarsimammagu. Innersuussutigivaalu kiassaatit kissartumik supoortut innaallagiatortut atorneqarsinnaasut:
- Tikissinnaasagut pitsaanerpaapput kiassaatit supoortut innaallagiartortut atorneqarnissaanut, Inunnguaq Lundblad oqarpoq.
INI A/S-ip ajornartorsiut aaqqinniarsaraa
Ataataasup angerlarsimaffitsik kialaartinniarlugu nalinginnaasuunngitsumik iliuuseqartariaqalersimavoq, grillerivik silami atortagaq atorlugu ilaquttani qiiannginniassammata kiassartariaqalermat. Ilaqutariillu pingasut SØMAmut kialaarnerusumut inissikkallarneqartut, INI A/S Sermitsiaq AG-mut pingasunngornermi paasissutissiivoq.
Inissiaatileqatigiiffiup Brøndum suleqatigalugu ajornartorsiut aaqqinniarsaraa, neriuutigalugulu ajornartorsiut piaarnerpaamik aaqqinneqarumaartoq.
INI A/S Brøndum suleqatigalugu kiassarnermut naleqqussarsinnaasunik ventililiorniarlutik aallartissimasut pingasunngornermi ilisimatitsivoq.
Tuapannguani inissiat 37-it kiassarnermik ajornartorsiuteqarput.