Siumup ataatsimeersuarnera
Sisimiuniit Kangerlussuarmut aqqut Siumup tapersersorpaa
Kangerlussuarmut aqqutissaq Siumup anguniagaanut ilaassaaq. Siumumi nuna tamakkerlugu ataatsimeersuarnerani aallartitat amerlanerussuteqartut tamanna aalajangerpaat.
Kangerlussuarmut aqqut Siumup anguniagaata ilagissagaat, Siumumi nuna tamakkerlugu ataatsimeersuarnerani aallartitat piumasaraat. Tamanna taasisinnaasunit 66-iusunit peqataasuni taasinernik 40-nik aalajangiiffigineqarpoq.
Qeqqata Kommuniani borgmesterip, Malik Berthelsenip, tamanna nuannaarutigaa, Kangerlussuarmut aqqut kommunimuinnaq iluaqutaanani nuna tamakkerlugu iluaqutaasussaasoq isumaqartuarpoq, naalakkersuinermillu suliaqartunit tapersersorneqartariaqarnerarlugu.
– Naalakkersuinermik suliaqartugut suleqatigalugit aqqusernup piviusunngortinnissaanut misissuieqqissaarnerput kommunimit nangissinnaanngoratsigu nuannaarutigaara. Kangerlussuarmut aqqutip Qeqqata Kommunianuinnaq iluaqutaassanngilaq, nuna tamakkerlugu aamma iluaqutaalluassaaq, isertitarineqartut amerlanerpaartaat akileraarutitigut nunatta karsianut tuttussaammata, Malik Berthelsen oqarpoq.
Kangerlussuarmut aqqut piviusunngorpat, sisorartarfimmik angisuumik, uumasuusivimmik, kiisalu unnuisunut katillugu illuaqqanut 600-nut sanaartornissanik ilaatigut pilersaaruteqartoqarpoq.