Sisimiut: 25-meterinik portussusilimmik qerititsivimmik sanaartornissamut pilersaarut
Qeqqata Kommuneani kommunalbestyrelsep ataatsimoorlutik, Sisimiuni talittarfimmi qeritsitsivimmik pilersitsisoqarnissaanut siunnersuutip eqqartugassarngortinneqarneranut akuersipput.
Sisimiut aningaasaqarnerata ingerlaneranut aalisakkerineq pingaaruteqarluinnartumik inissisimavoq. Nunarsuarmioqataanitsinnilu unammillersinnaanissamut piumasaqaatit annertuut malinnaaviginiaraanni atortunik ullutsinni malinnaasunik siuarsaanissaq pingaaruteqarluinnarpoq.
Massakkullu talittarfimmi atortut inissisimaneranni inikilliorneq peqqutaalluni siunissami suliffeqarfissuup malinnaanissaanut ingerlariaqqinnissaq siunniutissallugu pingaaruteqarpoq.
Qeqqata Kommuniani ingerlatsivik taama suliassanngortitsinissamut saqqummiussami oqariartuuteqarpoq.
Suliassanngortitsinissamut siunnersuuteqarnermi innersuunneqarpoq talittarfiup kitaata tungaanut allisitsinissaq aammattaarlu qerititsiveqarfimmik 25 meteritut portussusilimmik suliakkiissutigineqartussamik siunnnersuut ilaalluni.
Qaqqamit toqqorneqarumaarpoq
Talittarfiup allineqarnissaanut ilaavoq suliffeqarfinnut immikkut talittarfimmik niusiffiusinnaasumillu annertusaanissaq.
Tassanilu qerititsivimmik 25-meterinik portussusilimmik qerititsiviliornissaq immikkut sanaartorfissalerneqassaaq, taannalu aalisakkerisunut atorneqartussatut sanaajussalluni.
Illorsuaq pilersitassaq illoqarfimmiit isikkivigissallugu apeqqutaavallaarnavianngilaq, qaqqarmi 33- meterinik portussusillip illorsuup ilaa asseqasussaavaa, taamaallaalli talittarfissamut ilassut illoqarfimmut ilisarnaatitut ilaasinnaalluni takuneqarsinnaajumaarluni. Talittarfissaq nutaaq qaqqamit qaartitsiviusumit ujaqqat sanaartornermi kusassaataasinnaallutillu atorneqarumaarput.
- Royal Greenland tamakkiisumik tapersersorneqartariaqarpoq
Ingerlatsiviup siunnersuut eqqartorluarpaat tapersersorlugu siunissami suliffissaqartitsinermik illoqarfimmilu ineriartortitsinermik kinguneqarnissaanik ilimagisaqaramik.
-Suliffeqarfissuup Royal Greenlandip umiarsuaatileqatigiit peqatigalugit uppernarsereerpaat illoqarfiup aningaasaqarneranut, aalisakkanik tunisassiisarnermigut ajunngitsumik sunniuteqartarluni. Taamaammat talittarfiup allinissaanut politikikkut aningaasatigullu ingerlatsiviup tapersersinnaavaa pingaaruteqarluinnartoq Ingerlatsivik allagaqarpoq.
Pilersaarutit malillugit talittarfiup allineqarneranut kommunep aningaasaqarneranut sunniuteqassanngitsoq oqaatigineqarpoq, sanaartornermili inissap piginnittuata sanaartortitsisuata aningaasaliisullu allat tamanna aningaasartaliiffigissagaat siunertarineqarpoq.
Kommunalbestyrelsillu sapaatip akunnerini arfinilli tusarniaassutigineqarnissaa akuereqqammerpaa.