Sisorartarfik namminersortunit tiguneqarpoq
Sisimiuni sisorartarfik namminersortunngorsarneqarpoq.
Qeqqata Kommuniani kommunalbestyrelsimi ilaasortat atsiornerisigut Sisimiuni sisorarfiit namminersortunngorsarneqarput illoqarfimmilu suliffeqarfimmit Igloo Mountainimit tiguneqarlutik.
Qeqqani kommunalbestyrelsip kommunip ingerlataasa namminersortunngorsarneqarnissaanik kissaateqarnera tunngavigalugu taamatut pisoqarpoq.
Manna tikillugu Sisimiut Kangerlussuullu akornanni takornarissat illuaraannik ingerlatsinik suliariumannittussarsiuunneqarsimavoq sisorarfiillu namminersortunngorsarneqarsimallutik.. Qaamammilu kingullermi aamma Kangerlussuarmi bowlingertarfiup ingerlanneqarnera namminersortunngorsarneqarpoq.
Suliariumannittussarsiuussillunilu namminersortunngiorsaanikkut suliffeqarfinnik nutaanik aallartitsisoqarpoq kommunimilu inuussutissarsiornermut iluaqutaasumik kommunimi inuusutissarsiornermik inerisaasoqarluni.
Tamanna ilaatigut kommunip aningaasartuutikinnerulernerani kinguneqassaaq, soorlu assersuutigalugu bowlingertarfiup namminersortunngortinneratigut.
Sisorarfiit namminersortunngorsarnerisigut kommunip aningaasartuutai allanngussanngillat, Igloo Mountainilli takornarissanik sullissisarner inersarneqarsinnaalissalluni inuussutissarsiornermilu suliniutinik nutaanik allanik aallartitsisoqarsinnaalissalluni, borgmester Hermann Berthelsen oqarpoq.
Qeqqata Kommuniani suliassat allattaaq piffissami aggersumi namminersortunngorsarneqarlutillu suliarinnittussarsiuunneqassanerarpai, taamaalli akit eqqortut tunngavigalugit, taamatut erseqqissaavoq.