Sisorartunut aqqutiliuut imeqarfimmut nakkartoq
Sisorartunut aqqutiliuut Sisimiut imeqarfiannut nakkarpoq, kisianni mingutsitsinissamut navianaat annikitsuararsuuvoq, Nukissiorfiit nalunaarpoq.
Marlunngormat ualikkut Nukissiorfiit ilisimatinneqarpoq, sisorartunut aqqutiliuut Sisimiuni imeqarfimmi sikukkut nakkarsimasoq. Nukissiorfiit uuliakoornermit mingutsitsisimasinnaanerup qanoq annertutigisinnaanera ilisimasaqarfiginngilaa. Qatserisartut aqqutiliuut maannakkorpiaq qaqinniarsaraat, aamma aqqartartut aqqutiliuutip tankia putusimanersoq paasiniarlugu misissuipput, Nukissiorfiit tusagassiorfinnut nalunaarummi ilisimatitsivoq.
Suliffeqarfiup erseqqissarpaa imeqarfik nunami maani annersaasoq aammalu taamaattumik Nukissiorfiup naatsorsuutigaa mingutsitsisimasinnaaneq malunnanngingajalluinnarsimassasoq.
- Imermik pilersuinerup unitsinnginnissaa aalajangiussimavarput, imeq tatsip naqqaniit milluarneqartarmat uuliakoornermillu mingutsitsisimasinnaaneq erngup qaavaniissammat. Soorunami imeq imeqarfiup pumpeqarfiani nakkutigissavarput, tassani imeq imeqarfimmeersoq uuliakoqarnersoq nakkutigisinnaagatsigu. Uuliarrajuk sioqqat akornatigoorsinnaanngilaq taamaattumik erngup imerneqarsinnaanera naatsorsuutigaarput, Nukissiorfinni nukissiornermut siammarterinermullu pisortaq Jimmy Petersen oqarpoq.
- Aqqutiliuutip uuliamut tankia putusimassagaluarpat ruujorilluunniit matoqqasumik ingerlaarfillit allat putusimassagaluarpat suliniutit allat suut aallartissanerlugit nalilersussavarput, nangippoq.
Aqqutiliuut sisorartarfimmukaraluarpoq, imeqarfillu sinerlugu ingerlasaraluarluni. Avatangiisinut Pinngortitamullu Piosrtaqarfik ilisimatinneqareerpoq, Nukissiorfiit ilisimatitsivoq.